Hemserekê HDPyî ya qezaya Geverî Sores Dîrîyî pare kerd ke lêşinîya hewayî ya Geverî komirê bêkalîteyî ra ya ke AKP şarê xizanî mehkumê ci keno. Sores Dîrîyî îfade kerd ke no netîceyêka polîtîkaya rantî ya.
Merkezê Colemêrgî û qezaya Geverî lêşinîya hewayî ra binê rewşêka tehlukeyîne de yê. Goreyê 'Raporê Reşî yê 2021î' yê Platformê Heqê Hewayê Pakî Colemêrg hetê lêşinîya hewayî ra rêzê hîrêyînî de yo.
Hemserekê HDPyî yê Geverî Soreş Dîrîyî derheqê babete de ANFyî rê qisey kerd.
Soreş Dîrîyî da zanayene ke Yewîya Tabîbanê Tirkan vato ke lêşinîya hewayê Colemêrgî komirê bêkalîteyî ra ke pê destê dewlete yeno vilakerdene û no komir asta tehlukeyîne de karbondîoksît û karbonmonoksîd vila keno. Sores Dîrîyî vat: ''Na lêşinîye netîceya polîtîkaya rantî ya ke wextê AKPyî de bi hîra ameya vilakerdene. Şaro ke bi polîtîkayanê asayîşî xizan bîyo, neçaretîye ra nê komirî şuxilneno. No komir madenanê Şirnexî ra yeno vetene û ardene. Binê nameyê 'hetkarîye' de noo komir şarê xizanî ra yeno vilakerdene.
Deşta Geverî berhemêko tektonîk o, coka wexto ke komiro bêkalîte zî şuxilîyeno tesîrêkê xirabî keno vurîyayîşê hewayî. Na lêşinîya hewayî zî xora tesîrê heywanan, nebatan, merdiman û pêro xoza kena. Seba ke lêşinîya hewayî tewra vewre bena wexto ke vewre varena, awa şaristanî zî bena lêşin û nêweşîye vila kena.''
Sores Dîrîyî vist vîrî ke Tirkîya hetê çimeyê gazê hewayî ra girêdayeyê teberî ya û vat: ''Tirkîya seba ke gazê hewayî bigêra muracatê welatanê sey Rûsya û Îranî kena. Zafê lûleyê gazê hewayî serê şaristananê kurdan ra yan zî nêzdîyê şaristananê rojawanî ra şinê. Şaristanê ke gazê xozayî bi asanî eşkenê biresê ci nê îmkanî ra bêpar verdîyenê. Na hişmendîye pê destê AKP-MHPyî yena caardene. Coka lêşinîya hewayî ya şaristanê ma serrane nê her serre ya. Coka sey polîtîkaya dewlete gazo xozayî nêno ardene bi Colemêrgî. Îhaleya gazê xozayî di reyî ameye betalkerdene. 12ê çeleyî de îhaleya newîye do bêra kerdene û ma do nê prosesî nêzdî ra teqîb bikerê.''
