Qezaya Sûrî ya Amedî de seba Roşanê Qurbanan şar teşxele keno ke çîyêkî bihêrîno, amadekarîyanê xo biqedo la krîzê ekonomîkî ra dikanan destveng terikneno. 

Cîhan Karhano ke dikana ci ya datlîyan est a, da zanayene vera vayê berheman zêdîyenê û se ra 40 vaya şîranîyan zêdîyaya. Karhanî vat: ''Merdimî nêeşkenê çîyêkî bihêrînê. Zeman tesîrê ma zî kerd. Par kîloyêkê datlî 180 lîra bi emser 210 lîra yo.''

Mehmet Alî Çolakî pare kerd ke meaşê asgarî ameyî zêdînayene la narey zî vayê berheman zêdîyayê. Çolakî vat: ''Keyeyî nêeşkenê goştî berê keyeyê xo. Ganî verê nê zeman bêro girewtene.'' 

Îzzettîn Goalpî ard ziwan ke kîloyêkê goştî bîyo 220 lîra û vat: ''Çew nêeşkeno goştî bigêro. Teyna ê kesê ke raya xo daya hukmatê dizdî eşkenê goştî bigêrê. ''

Aysele Uçak dîyar kerd ke a nêeşkena domananê xo rê seba roşanî kincan bigêra û vat: ''Hîrê domanê mi zî wanenê la ma nêeşkenê îhtîyacanê înan peyda bikerê. Ez nêeşkaya nê roşanî de goşt bihêrîna, çunke zaf vay o. ''

Bunyamîn Sekmenî vat: ''Par vaya qolonya 30 lîra bi nika 50 lîra yo. Ne şar eşkeno çîyêkî bihêrîno ne zî ma eşkenê çîyêkî biroşê. Merdimî nêeşkenê nanî berê keyeyê xo. Meaşê ma helîyeno. Wa îqtîdar nêeşkeno welatî îdare bikero şoro.''

Îbrahîm Ozero ke kincan roşeno vat: ''Zêdîyayîşê erjê dolarî zaf tesîrê ma keno. Ma berhemanê xo ra teyna 1,5 lîra qezebç kenê. Ma binê tîja germe de xebitîyenê la roje de ancax 50 lîra qezenç kenê.''