Şirnex de talanê xoza bêmabên dewam keno. Koyê Cûdîyî de awa lêşine ya madenanê komirî herikîyena Dereyê Nerdûşî û awe kena lêşin. Dereyê Nerdûşî zî herikîyeno Çemê Dîcle. 

Şarê herême awa lêşine ra nêeşkeno heywankarîye û zîret bikerê. Wekîlê HDPyî yê Şirnexî Huseyîn Kaçmazî derheqê mesele de ANFyî rê qisey kerd.

Kaçmazî eşkera kerd ke 2015î ra nara hêriş û talanê vera xozaya Şirnexî dewam kenê û vat: ''Awa Nêrdûşî sey komir herikîyena. Dewijê ma hînî mexdûr ê. Ma hende nêrazîbîyayîşê xo mojna la mesele çareser nêbî. Şarê ma bêawe vera dîya. Gandarê bînî yê herême zî yew bi yew awa lêşine ra mirenê. Heta ke rewşa Dereyê Nêrdûşî rinde nêba ma do na mesele teqîb bikerê û rîyê talankeran teşhîr bikerê.''

Kaçmazî ard ziwan ke hukmatê AKP-MHPyî xozaya Kurdîstanî xo rê kerde cayê rantî û vat: ''Koyê Gabar û Cûdîyî hetê dewlete ra yenê vêşnayene. Nê kesî xozaya Kurdîstanî ra ecîz ê û wazenê bi nê hawayî kurdan ra qesasê xo bigêrê. Ê dara ma birnenê, koyê ma vêşnenê û awa ma herimnenê. Hukmat pê nê polîtîkayanê şerê taybetî şar muhtacê xo keno. ''

Kaçmazî peynîya qiseykerdişê xo de wina vat: ''Herêma Şirnexî de tewr tay 100 madenê komirî estê û nînan de asayîşê karkeran nêno caardene. Dewlete koy û wareyî şarî rê kerdî qedexe û nê cayan sey 'herêma leşkerî' xebitnena. Herêma ma hetê komirî ra zengîn a la na pero zengînîye şina terefgîranê AKPyî. Şarê ma xizan o û neçarîye ra nê madenan de xebitîyeno.''