Wareyanê Colemêrgî û sîstemê ci yê serwerîya dadîyan de cinîyî hem mîyanê xoza de hem zî hetê berardişî ra wayîrê hêzê qerardayîşî yê.

Colemêrg de cinîyî serê sibayî dest pê karî kenê.

Wareyê Merga Butanî yo ke bi 12 kîlometreyî merkezê Colemêrgî ra dûrî de yo, pê rindîya xo û xozaya xo namdar o. Şar mabênê gulan û teşrîna verêne de şino ware, tede hem heywananê xo weye keno hem zî berhemanê wareyî yê xozayîyan arê dano û roşeno. Nê karî zî zafêr hetê cinîyan ra yenê kerdene. 

Gulbeyaze Keskîna ke dadîya 4 domanan a ard ziwan ke ware zaf rind o û ê ware de eşkenê nefesî bigêrê. keskîne vat: ''Ma tîya ra berheman arê danê, ware de pendîr, mast, şîrê xo virazenê. Ma ge nînan roşenê ge zî semedê zimistanî benê keyeyê xo.''

Zubeyde Yetîşa ke dadîya 7 domanan a vat: ''Ma 5 kîlo şit 150 lîra ra roşenê la şar vano 'vay o.' Hînî îmkanê şarê ma çin o ke çîyêkî bihêrîno. Ma hende zehmetî ancenê la nêeşkenê berhemanê xo biroşê. Hînî qîmetê pereyî nêmendo.''

Dadîya 11 domanan Nazîme Tunç vat: ''Cuya wareyî zaf rind a la tede zehmetîyî zî zaf ê. Hamnanan zaf germ beno, toz wurzeno we. La cuya ma na ya. Verînê ma zî na cuye ciwîyayêne.''

Asîye Ozdemîr vat: ''Cuya wareyî zaf weş a. La krîzê ekonomîkî ra hînî merdimî sey verî nênê tîya. Çunke her çî zaf vay o. Ma ware de heywananê xo pêsnenê, berhemanê heywanan virazenê.''

Zeynepe Ozer vat: ''Serê sibayî nimajî ra dima ma şinê heywanan doşenê. Ma şitê xo girnenê û kenê mast û pendîrî. Ez her kesî rê cuya wareyan pêşnîyaz kena. Tîya de aramîye est a. 24 serrî yo ez tîya de karî kena. Şarê Colemêrgî zaf eleqe mojneno berhemanê ma.''