Zulkuf Kişanak dewa Sêwregi Kerteş de ameyo dinya. Sêwregi de dest bi mektebî kerd. Sinifê dîyine de keyeyê înan bar kerd şî bi Tarsus. Uca lîse qedîna. Dima Unîversîteyê Marmara de qismê Rayberî û Şêwirmendîya Psîkolojî (PDR) wend. Sinifê çaharine de bi munasebetê xebata sîyasî fek wendiş ra verada. 

Serra 1990 de rojnameyê Yeni Ülkede dest bi rojnamegerîye kerd. Rojnameyanê Özgür Gündem, Özgür Ülke, Yeni Politika, Demokrasi, Ülkede Gündem, Özgür Bakış, 2000’de Yeni Gündem, Azadiya Welat û kovara Özgür Yaşam de xebitîyayo. Demeyêk di embazê xo ya pîya Dîyarbekir de kovara Medlife vete.

Zulkuf Kişanak tirkî, kirmanckî û kurmanckî nuseno. Kitabê eyê ewilîn ziwanê tirkîya bi nameyê Yitik Köyler 2004 de hetê Belge Yayınları ra çap bi. 

Zulkuf Kişanak bi sedemê ke nê kitabî de şexsîyetê dewlete rê heqaret kerdo hetê mehkemaya eslîye yê huqûqî yê Îstanbulî ra qanunê numre 301 ra ame mahkemekerdiş û 5 mengî cezayê hepsî ro ey birîya. La dima qanun vurya û na ceza ra reya. 

Zulkufî nê kitabî ra xelata Ayşe Nur Zarakolu yê heqê merdiman girewte. Verê cû zî bi şîîra xo Delala Çimrengîne rê Qesîdeyî serra 2004 de musabeqeyê 12. yê şîîran yê Huseyîn Çelebî de xelata yewine girewte. 

 

Eserê eyê ke hetanî nika weşanîyayê:

 

1- Zulkuf Kişanak, Yitik Köyler, Belge Yayınları, Îstanbul 2004, 200 sayfa

2- Zulkuf Kişanak, Delala Çimrengîne rê Qesîdeyî (şîîre), Weşanxaneyê Vateyî, Îstanbul 2007, 96 rîpelî

3- Zulkuf Kişanak, Ahparik Sarkis, Aşağı Mahalle Yok Artık, Belge Yayınları, Îstanbul 2011, 263 sayfa

 

                                    ***

 

Nika ma cêr de kitabê ey "Delala Çimrengîne rê Qesîdeyî" ra çend nimûneyan bivînê.

 

QESÎDE - 1

 

Qîrîya mi

 

Delala çimrengîne, eşqa girde

tîja mi

Werze delalê

Delalê

vilika koyan, roşnîya vewre, embaza asmênî

gizgaleka zerrîya ma

werze

roj akewt

kişta bîne ra, vera Helezinî ra

 

Biewnî

teq-reqa asinî ra

bêtaran ra

Dereyê Çalindêle ray nêdano nê bêtaran

nê bêwayîran

rakewtiş mergê ma yo delalê

werze

 

Tîya

nê dere yîde

û hetê Gaza Şewsînî de

kewtî

ciwanî

kal û kokimê ma

wextê Şêx Seîdî ra nat a

 

O wext

sey nikayî, sey ewroyî

day adirî ver

şarê Rîzî

meymanê Awa Hemeke, awa kewserî

û Çemê Sarume

werze

o wext topî

nika zî bombeyê qazanan eştî

û kîmyayî,

bêqusûr danê qefesê ma ro

delalê

Ne camîya Mela Sidiqî

ne mekteb

û ne zî yew keye mend

leteyanê bombeyan ra pey

nê cennetî de, cenneto ke çar kitaban ra weşêr o

dewa Rîzî de

delalê

 

Û delala çimrengîne, eşqa girde

tîja mi

 

Doktor Ezîzê ma,

ê şima

û new embazî

bi bombeya kîmyewî kiştî

vîstê kanûne hezar û newsey û neway de

kîşta Xorxolî de

serê kayê berzî, kerreyê Sûrî de

 

Erê

erê delale

wa adir biperro zerrîya mi

û Zîyara Dêdwanî

 

Biewnî

a uca de, kîşte û kinoro bîn de

Qula Baw Mistî esta,

hewna tutum pêşeno, a qula bêbine de

û na kîşta ci de zî Dereyê Geyikî esto

weş biewnî

qijan uca ra eşt Mehê Seye ma

lajê embiryanî

terteley arminîyan ra dime

labelê Meh Sey, newayserrîya xo de şî heq

wax dewrê terteleyî şarê Mence rê

wax

 

Werze,

werze delalê

adir kewt zerrîya mi, biewnî gijgij kena hêna

înan no fin Mele Sidiqê ma zî kişt

kuçeyê tengî û bêvengî de

sûka bapîran

amed de

roj vîyart, wext, wext berey bi

de werze

û goş bide zîbezîbê zerrîya mi

zerrîya tenike

delalê

 

Û delala çimrengîne, eşqa girde

tîja mi

                       

17.10. 2003 

 

 (Delala Çimrengîne Rê Qesîdeyî)

 

QESÎDE - 2

 

hawar

 

nê rasteyî de

cayê nê mektebî de

binê nê daran de

tutî, tutekî bîy gird

bîy berzî

a tîya de

e

e willey, bîley

biewnî ci ra,

goş bide ci, vengê înan yeno hêna

dorûverê na dimdûzeke ra

 

ka êasinkarî, nalbendî

torzinî û huyeyî viraştî

hostayanê altûn û sêmî

 

ka Sarîga xaseke

û maya Mirgirdiçî, Saro, xala ey Mîrye

ka ê ke tîya de, na kaleke de

 

binê nê daran de

binê nê murîyêr û sayêran de

cil û cawî viraştî, ê ser a şîy 

ser a şîy, heme qeç û qulî

ê leyrekî, ê kokime

û ka zîqzîqê êşarî

devaje Dereyê Zîyare, de vaje ke wa alem bizano

Mehemedê Hesî çiçî ard sereyê ç şarê to

arminîyan

 

to se va

çiçî

 

e

e bira

xem nêkeno

biewnî newe ra

û goş bide ci

ka se vato nê camêrdan, nê bêwayîran

nuşteyê nê dêsî ser o

dêsê mektebê Herêdanî ser o

mektebo ke qijanê ma keno kerr

keno ko rû bêziwan

û ewro zîdewijan rê bîyo sitare

 

nê nuşteyî de vano ke:

“Atam sana mınettarız”

 

Winî yo

Winî ha

Hawar minnetê qetlê hezar serran rê

Û zilmê bêqusûrî rê

Hawar

 

wuş

wuş zilm û zorê nînan rê

şermo gird

û bêar

 

dime ra 

heştay serrî vîyartî

heştay zimistanî dîy Kerrey Rabe

û peynîya peynî de

hawar û qîrî kewte Deşteke

ca de, verara maya xo de mend

bêsolix, bêgan û bêveng

a Esîa werdîleke, a leyreka hîrêserrîye

wextoke babîyê aye Dewrêş

day gulan ver

leşkeran

 

a roje 

a roja ke merg ma rê varayne

pêroyê kokiman sewbîna zewtî day

û wexto ke roj felqe-felqe akewtîbî

aşme zî şerme ra rîyê xo taday, şî

gimgima adirî kewt Pîrejman

dewa her di Mehmedan

hawar

hawar mi rê

 

tîya de

a tîya de

hela biewnî nê kerran ra, nê koyê bêray ra

biewnî Çemê Dîjle ra

beyntarê Kelkomî û Zixrî ra

hîris û heşt embazî kewtî

a tîya de

na şikefta ke şewe û roje qîreqîr kena de

serra neway û hewtî de

beno ke neway û heyştî bo, ez rind nêzana

hewn de bîy, rakewte bîy

bêveng

û bêhalan,

delalê

 

û delala çimrengîne, eşqa girde

tîja mi

 

awe

Awa Melenî, Xeyd û ê Yenî Dabo ya

erê bira

wexto ke Yanik Koşk de Nacî û Fehmî kiştî

nê awkî bermî ra birîyay

bêtaqet û bêeşq kewtî

û tenê hesrî amey war nê çiman ra

nê çimavkan ra,

sey wextê terteleyê şarê Migirdîçî ardî xo vîrî

hawar û hawar delalê

 

(Delala Çimrengîne Rê Qesîdeyî)

 

QESÎDE - 3

 

Awka Zagê

 

To Dêrsim dîyo

ê koyî û ê çimeyî

Awka Zagê

cayo ke Elî Heyderê ma bi gird

 

Bewnî

nê koyan ra, no kerreyo sipi çend berz o

a kîşte û na kîşte de

mîyan de zî Awa Xarçikî

çend weş a, çend delal a

û şina, winî bêveng, bêçare bermena ke

verê xo dayo Heqî û Heyderan

halînê Xidê Elê Îsmî, babê Ap Hesenî

û kalê Elî Heyderê ma

A roje

a roja ke Seyîd Riza kewt raya Erzinganî

laser werişt bira û pêroyê milçikan xo nimit

tirkan ra

binê nê daran û qûlê koyan de,

bê to û bê Xizir Bavay, bê domanan

bê cinîyanê ke Kerreyê Laçî ra xo eşt Munzurî mîyan

kam mendibi delalê, nê koyan û newalan de

qey nêno to vîrî

o wexto ke adir perra zerrîya Pirdê Mûtî

wax, wax û hawar

delalê

Û delala çimrengîne, eşqa girde

tîja mi

 

veng

veng bide embazê ma

embazê Heqî

Bûyêr Bava

de rew bêre

û veng bide milê Hengirwanî

Rosnekî, Dereyê Qutî

biewnî, veng û verit mendî heme koyî

heme newalî û Dêrsim

wexto  ke tirkan Seyîd Riza berd Xarpêt

erê

 

“e

e bira

ti qet mezane

wa bizano şar

nê ganî, nê erdişsipî çî dî û çi nêdî

e bira, ez apê to Hesen o

no Dêrsim o, ka Balikkesîr û Savaştepe

tew, tew, tew

tew lo bira”

 

18.10.2003   

                       

(Delala Çimrengîne Rê Qesîdeyî)