12ê teşrîna peyêne de şaristanê Kobanê yê Rojawanê Kurdîstanî de Festîvala Edebîyatî dest pêkerd. Xeylêk edebîyatkarî festîvale de amade bîyî. Beşdaranê festîvale derheqê ziwan û edebîyatê kurdkî yê Rojawanî de ANFyî rê qisey kerd.

Vervatoxa Dîwanê Edebîyatî yê Rojawanî Narîmane Evdikê dîyar kerd ke festîvalê winayênî zaf girîng ê û vat: ''Ma do hîna zaf bikerê ke ziwanê kurdkî zengîn bibo. Ma do kêmasîyanê xo bi panel û semîneran raşt bikerê. Ganî pêro dezgeh û rêxistinî wayîrê ziwan û edebîyatê kurdkî vejîyê. Şorişê Rojawanî xora xo reyde zaf destkewteyî ardî. Edebîyatê kurdkî zî bi şorişî zaf aver şi.''

Hemserekê Heyetê Kulturî yê Herêma Firatî Zîyad Elîyî vat: ''Ma armanc kenê ke bi na festîvale ziwan û edebîyatê xo aver berê. Şorişê Rojawanî ra dima asta averşîyayîşê kurdkî zêdîyaye. Îdareyê Xoserî no kerd. Festîvala Kobanê zî nê averşîyayîşî de wayîra rolêkê girîngî ya.''

Akademîsyenê Zanîngehê Rojava Salihê Heydoyî vat: ''Ziwan û edebîyatê kurdkî bi serran hedefê asîmîlasyon, hêriş û qedexeyan de bîyî. Ma bi nê festîval û aktîvîteyan kenê ke verê kurdkî abikerê. Ziwanê ma ziwanêko zengîn o. Xêrê şehîdanê şorişî ra ziwanê kurdî zaf aver şi.''