Amed de bi beşdarîya Kurd-Penî, Komeleya Cigêrayîşê Ziwan û Kulturî ya Mezopotamya û Platformê Qelema Cinîyan ê Mezopotamya ''Şewa Şîîran'' ameye serûberkerdene. Wekîla HDPyî ya Colemêrgî û Hemsereka Kongreya Komelê Demokratîkî (KCD) Leyla Guven, Wekîla HDPyî ya Amedî û Hmsereka DBPyî Salîha Aydenîz û zaf kesî beşdarê aktîvîte bîyî.

Leyla Guven a ke aktîvîte de qisey kerd vat: "Cinîyê kurdî wazenê ke têkoşînê xo yê vera asîmîlasyonî pêro dinya de bidê zanayene. Nika tîya de embazê ciwanî estê. Ê şahîdê têkoşînê verênî yê vera asîmîlasyonî nêbîyî la bi qelemanê şahîdan pê hesîyayî. Nika ê kesî bi nuştişî têkoşînê xo danê zanayene. Ganî ma wayîrê nê têkoşînê înan bivejîyê. Ziwanê ma, kitabê ma , deyîrê ma, şîîrê ma yenê qedexekerdene la şarê kurdî hema zî vera nînan têkoşînê xo dewam keno. Roboskî û Til Rifat de domanî ameyî qetlkerdene. Şarê kurdî do ney xo vîrî ra nêkero. Ganî ma vera nînan vajê hînî bes o. Kurdan ra ber dostê kurdan çin ê. Cinîyê kurdî, şerwanê kurdî vera nê sîstemî milê xo do çewt nêkerê. Ma do wayîrê ziwan, kultur, tarîxê xo bivejîyê. Ma do nê qedexeyan nas nêkerê."

Salîha Aydenîz zî vat: "Xoverdayîşê cinîyanê kurdan hetê pêro dinya ra sey mîsal yeno qebulkerdene. La wazenê ke nê destkewteyanê ma çin bikê naye ra hêrişê Rojawanî kenê. Destkewteyanê Rojawanî kenê hedef."

'Ma do Tedaya Vera Ziwanê xo Qebul Nêkerê'

Nuştox û rojnamegere Roza Metîna îfade kerd ke ê ameyî pêser ke şîîranê cinîyanê tepişteyan ê kurdan biwanê ke nameyê nê cinîyan nênê zanayene û vengê înan nênê eşnawitene. Metîna vat: "Ma do wayîrê erjanê xo bivejîyê û vera asîmîlasyonî têkoşînê xo dewam bikê. Ma do dewam bikê ke bi kurdkî bifikîrê, qisey bikê û binusê. Ma do tedaya vera ziwanê ma qet qebul nêkerê."

Cinîyan aktîvîteya Şewe Şîîre ra verî Postaxaneyê Ofîsî de ameyî pêser û seba cinîyanê tepişteyan kitabî û mektubî erşawitî.

Aktîvîte bi wendişê şîîran qedîyaye.