Amed de ferhengê kurmanckî-tirkî yo ke hetê Ziwannas Zana Farqînîyî ra ameyo amadekerdene, bi bernameyêkî dîya şinasnayene. Bername hetê Komeleya Cigêrayîşanê Kurdan, Komeleya Cigêrayîşanê Kultur û Ziwanî ya Mezopotamya (MED-DER), Enstîtuyê Kurdan ê Amedî û Komeleya Destarî ra û bînaya MED-DERî de ame amadekerdene.

Temsîlkar û îdarekarê Rêxistina HDPyî ya Amedî, Komeleya 78an, Komeleya Nuştoxanê Kurdan, Komeleya Huqûqnasanê Seba Azadîye (OHD) û xeylêk ziwannas, mamostayî tewrê bernameyê daşinasnayîşî bîyî.

Bername de verî Hemserekê MED-DERî Rifat Ronîyî qisey kerd û ard ziwan ke Ehmedê Xanîyî bingeyê ferhenganê kurdkî eşto û nika zî şagîrtê ci ferhengan amade kenê.

Hemsereka Komeleya Cigêrayîşanê serê Kurdan Remzîye Alparslan zî ard ziwan ke girîng o ke ziwanê kurdkî neqlê neslanê bînan bêro kerdene û vat: ''No ferheng seba amadekerdişê ferhengê kurdkî bi kurdkî gamêka fîraz a.''

Zana Farqînîyî peynîya bernameyî de qisey kerd û pare kerd ke ey xeyalê xo ardo ca. Farqînîyî vat: ''Seba ziwanî hîrê sutûnî est ê; gramer, alfabe û ferheng. Coka ganî ferhengê kurdkî bi kurdkî bêro amadekerdene. Mi kerd ke ez vengê kal û pîranê xo pê nê ferhengî qeyd bikera. Heyf ke ma sey kurdan girîngîye nêdanê ziwanê xo. Ganî ma her çî bi ziwanê xo bikerê. Ganî erjê ziwanê ma pêro ziwanan ra wetêr bibo; çunke oyo ke girîng o ziwanê ma yo.''

Bername bi daşisnayîşê ferhengî û aktîvîteya îmzayan ra dima qedîya.