Hêrişê dewleta tirke yê vera kultur û hunerê kurdan dewam kenê. Konser û deyîrê hunermendanê kurdan yenê qedexekerdene, kuçeyan de hunermendê kurdî raştê hêrişanê polîsan yenê.

Hunermend Azad Bedranî derheqê hêrişanê vera kultur û hunerê kurdan de ANFyî rê qisey kerd.

 Bedranî dîyar kerd ke seba ke verê nêrazîbîyayîşê vera hêrişanê hunermendanê kurdan bigêrê qedexe dîyeno tay hunermendanê tirkan ser. Bedranî vat: ''Bi nê hawayî mesajê 'Ma têna kurdan nê hunermendanê tirkan zî qedexe kenê.' danê. La hişmendîya asîmîlasyonî 40 serrî verî çita bîye nika zî heman a.Polîtîkaya asîmîlasyonî tim yena caardene. Hunermendê kurdî seba wayîrvejîyayîşê kurdkî têkoşîn kenê. Coka yenê astengkerdene. Tay hunermendanê ma vatêne 'Ez deyîra sîyasîye nêvana, konserê mi nêrê qedexekerdene.' La ma dî ke wina nîyo. Nê qedexeyî sîyasî yê. 

Kanalêka TRTyî yo ke goreyê xo kurdkî weşane kena, wazena pêro hunermendanê kurdan dormeyê xo de bîyara yewca.Meseleya ma na nîya. Hunermendî neçare yê ke îqtîdarî reyde pêbikerê. Ganî vera hêrişan û qedexeyanê serê hunermendanê kurdan hîna zaf nêrazîbîyayîşî biameyêne mojnayene. Ganî hunermendê kurdî vengê xo berz bijerê. Tewir, parekerdiş û nêrazîbîyayîşê embazanê ma qîm nêkenê. Êyê ke konserê înan yenê qedexekerdene zî nêrazîbîyayîşê xo xurtî nêmojnenê.''

Bedranî vist vîrî ke di serrî verî di konserê ey zî ameybî qedexekerdene û vat: ''Walîtîya Mêrdînî destûr nêdabî la Walîtîya Îzmîrî destûr dabî. Seba ke derheqê mi de dewayî est bîyî konserê mi ameyî betalkerdene. Tay hunermendî est ê hunerê xo lîberalîze kenê û deyîranê xo bi tirkî vanê. No çare nîyo. Eqsê ci ganî nêrazîbîyayîşo pîl bêro mojnayene. Ganî hunermendî tewirê xo bi zelalî bimojnê, eşkera bikerê.''