Şaredarîya Bêgirî Keyeyê Meymanan û Kitabxaneyê Ayşe Şan akerd.  Keye û kitabxane 3 aşman de bi îmkananê tayan ame akerdene. Keye û kitabxane bi fotografanê dengbêja cinîye Ayşe Şan, tevgerayîşê cinîyan ra Rosa Luksemburg, Susane Sontag ameyî xemilnayene.
 

Çarçewa projeyî de zaf nuştoxan û şarî paştî daye kampanyaya kitaban a ke hetê Şaredarîya Bêgirî ra ameye serûberkerdene. Keyeyê meymanan o ke tede fîlmî bêrê mojnayene sey merkezê mişewreyî zî bêro xebitnayene. Keyeyê meymanan de sosyologêke zî do biba û meselê cinîyan do bêrê çarekerdene. 

 Hemsereka Şaredarîya Bêgirî Leyla Balkan wina vat: "Ma soz dabi cinîyan ke ma seba înan cayêk abikê. Dima ma dest pê xebata ci kerd. Îmkanê ma yê madî zaf kêm bîyî. La ma reyna zî dest pêkerd. Ma tîya bi fotografanê cinîyanê kedkaran û cînyanê ke bi rayberîya têkoşînê cinîyan kerd xemilna. Ma Zehra Dogan reyde qisey kerd, aye ma ra resimê cinîyanê ke vera cû xêzkerdibî erşawitî. Ma kampanyaya kitaban daye destpêkerdene. Nuştoxan kitabê xo yê îmzakerdeyî erşawitî, medyaya komelkî ser o her kesî paştî daye ma. Ma seba cinîyan tay fîlmî zî weçînayî ke bimojnê înan. Tîya seba cinîyan sey merkezê mişewreyî zî bêro xebitnayene."

"Heta nika têna Îstanbul de kitabxaneyêko ke kitabanê cinîyan ra yeno meydan amebi akerdene. Ez wina fikirîyena ke ma seba şaredarîyanê bînan zî sey mîsal benê. Hetê keyeyê kitaban de nêweşxaneyêk esto. Kesê ke dewan ra yenê hînî mecbur nîyê ke bi seatan nêweşxaneyî de vinderê. Qato ser seba wendekaran sey wareyê dersxebitîyayîşî û wendişê kitaban ame sazkerdene. Ma wazenê aktîvîteyan zî bikê ke tede têdûştîya komelkîye, temsîlîyetê têdûştîye û azadîye yenê behskerdene. Ma do wina xebetan bikê ke cinîyî têna keyeyê xo de ney, her warê cuye de aktîf bibê. Ma sey cinîyan nînan heq kenê. Çunke cinîye nêmeyê cuye ya."