Dewleta tirke 2018 de cerganê xo reyde vera Efrînî hêrişê îşxalî kerdbî. Şarê Efrînî 58 rojan vera îşxalî xo ver da. Serkêşîya Komîteya Karanê Komelkîyan de hêrişê îşxalî yê dewleta tirke yê vera Efrînî, xoverdayîşê şarî û koçkerdiş hetê 13 resiman ra tabloyêkê 58 metreyî ser o ameyî xêzkerdene.

Resim qala 4 safhayan kena. Safhaya yewine de şarê Efrînî bi aramî ciwîyeno, safhaya diyîne de hêrişê îşxalî dest pêkenê û şar 58 rojan xo ver dano, safhaya hîrêyîne de şar neçare maneno ke koç bikero û safhaya çarine de zî şar agêreno Efrîn.

Endama Komîteya Karanê Komelkîyan Hêvîne Şemîya derheqê resimî de ANFyî rê qisey kerd.

Şemîya ard ziwan ke seba ke qala koçberîye û îşxalî ya 5 serran bikerê înan bi nameyê 'Hîkayeya Welatê Zeytûnan' projeyêk viraşto û vat: ''Ma waşt bi rayîrê nê projeyî xoverdayîş û dejê şarê ma, barbarîya dewleta tirke mojnenê. No resim raştîya Efrînî eşkera keno.

No resim hetê 13 resaman ra ame xêzkerdene ke nê resaman ra yew zî domano 8 serre yo. Şarê Efrînî îşxalî ra verî mîyanê haştî û aramîye de bi. Sey her şarî şarê Efrînî zî wazeno bi kultur, nasname û ziwanê xo biciwîyo. Coka ganî peynîya îşxalê dewleta tirke bêra. Şarê Efrînî seba ke abigêro wa her kes wurzo we.''