Kampa Multecîyan a Rûstem Cûdîyî ya Mexmûrî de hunermendê qijî yê Koma Jînim Jiyanim a Stêra Zêrîn ya Mexmûrî bi huner û deyîranê xo bale ancenê.

Koma Jînim Jiyanim a Stêra Zêrîn 10 kesan ra yena pê û hîrê serrî yo Merkezê Stêra Zêrîn a Mexmûrî de perwerde vînenê. Kome şayîyan de vejîyena sehne ser û hunerê xo pêşkêş kena. Kome çalakîya nobete ya vera tecrîdê serê Rayberê Şarê Kurdî Abdullah Ocalanî de zî deyîran vana.

Endamanê Koma Jînim Jiyanim a Stêra Zêrîn derheqê karanê xo de ANFyî rê qisey kerd.

Yasîn Apaydinî ard ziwan ke wexto ke ê deyîran vanê kêfweş benê. Yasînî vat: ''Ma pê deyîran hem keyfê xo anê hem zî keyfê şarî anê. Ma wazenê Rayberê ma azad bibo. Ma deyîranê xo dîyarîya Rayber Apoyî û gerîlayan kenê.''

Viyane Yîgît vat: ''Ma sey kome hîrê serrî yo perwerde vînenê û deyîran vanê. Ma tîya de hunerê kurdkî musenê.''

Dezdar Utunî vat: ''Ma deyîranê serê Rayber Apoyî, şehîdan, gerîlayan û Kurdîstanî vanê. Her deyîra ma de babetêke est a.''

Nalîne Apaydin vat: ''Ma pê deyîranê xo şarî kêfweş kenê. Ma cayê çalakîyan de deyîran û hunerê xo pêşkêş kenê. Ma bi deyîranê xo hêrişanê vera kurdan şermezar kenê. Ma venga pêro ciwanan danê ke wayîrê kultur û hunerê kurdan vejîyenê.''