Festîvala Kultur û Xoza ya Munzurî ya 22ine bi aktîvîteyanê cîya-cîyayan dest pêkerd. Meymanê ke seba festîvale ameyê şaristanî bi dahol û zirna ameyî pêşwazîkerdene. Hemşaredarê Dêrsimî Bîrsene Orhan û Cevdet Konak, Hemserekê DADî Kadrîye Dogan û Zeynel Kete û Wekîla DEM Partî ya Dêrsimî Aytene Kordu zî tede xeylêk kesan seba startê festîvale merkezê şaristanî de eşkerayîyêke daye.

Eşkerayîye de Hemşaredar Cevdet Konakî da zanayene ke 24-25ê temmuza 1923yî  tarîxê çinhesibnayîşê tarîx, nasname, kultur, elewîtîye bîyo û vat: ''Na festîvale vera ê ferasetê çinhesibnayîşî yena kerdene. Dêrsimijan vatbi 'Şima nêeşkenê ma çin hesibnê û nika reya vîst û diyîne na festîvale yena kerdene.''

Zeynel Keteyî zî bale ante hêrişanê serê xozaya Dêrsimî û vat: ''Na menga ke menga Muharemî ya, sembola xoverdayîşî ya. Wa nê welatî de şarî bi haştî û aramîye biciwîyê. Ma ziwan û tarîxê xo vîr a nêkerê. Ziwan estbîyayîşê ma yo, ziwanê Xizirî yo. Ma wayîrê ziwanê Xizirî vejîyê.''

Aytene Kordu vat: ''Dêrsimijî her asta de înkar, îmha, talan û asîmîlasyonî rê maruz bîyî. Bi na festîvale ma armanc kenê ke vera înkar, îmha, asîmîlasyon û talanî kultur, ziwan, bawerî û huqûqê Dêrsimî bipawê. Coka ma tîya de yê.  Seba xoza, kultur, ziwanê xo ma do vengê xo berzêr bikerê. Ma do tim nê kuçeyan de bibê.''

Eşkerayîye ra dima Kuçeyê Hunerî de Koroyê Domanan ê Behzat Fîrîkî konserêk da.