Kooperatîfê Cinîyan ê Pulurî yê Dêrsimî qeraxê Çemê Munzurî de seba 4 roja kargehê muzîjî serûber keno. Kargeh de 50 cinîyî perwerdetê hacetanê muzîkî gênê. Cinîyî pê şîarê 'Cinîyî cu yê û parçeyêkê xoza yê perwerdeyê xo mîyanê xoza de anê ca. Cinîyî hedef kenê ke ameyox de perwerdeyê xopawitişî zî bidê. 

Endama kooperatîfî Nurgule Ersoy Uc da zanayene ke kooperatîf serra 2019î de ame ronayene û 70 endamê ci estê. Nurgule vat: ''Cinîyî eşkenê her warê cuye de ca bigêrê. Kargehê ma vera wetêrkerdişê cinîyan reaksîyonêk o.  Vengê cinîyan û xoza sey ci yê. Coka kargehêko winasên seba destpêkerdişî weş bi. Seba ke cinîyî vera şîdetî xo bipawê tay planê ma estê. Ma cuye de estê. Seba ke cinîyî ameyox de hîna zixmêr bibê ma wazenê xo rêxistin bikerê. Armancê ma yo verên no yo ke cinîyî her hetî ra hêzêr bibê.''

Beşdaranê kargehî ra Zelale Sungur zî pare kerd ke a kêfweş a ke tewra nê kargehî bîya. Zelale vat: ''Cinîyê ke şaristanan de ciwîyenê eşkenê xo biresnê organîzasyonanê winasênan. Ma waşt ke cinîyê bînî zî wina xo biresnê nê organîzasyonan. Coka ma kargehê xo tîya de kenê. Mi hem muzîkê  ma ra hem zî kombîyayîşê ma ra no çi hîs kerd; Cinîyî zaf qayîl ê ke hunerî reyde eleqedar bibê û çîyê neweyî bimusê. Muzîko ke xoza ra dûrî yo mehkûmê mergî yo. Cografyaya winasêne de xora ma kargehê xo zî qerax de kenê.''