Eyaz Yûsif û Erdewan Zaxoyî yê ke 37 serrî verî ameybî qetilkerdene, bi deyîranê xo û têkoşînê xo yê Azadîye Behdînan de bîyê bêmerg û tarîxê Kurdîstanî de cayê xo girewt.

Erdewan Elîyo ke bi nameyê xo yê hunermendî Erdewan Zaxoyî 1957 de keyeyêkê xizanî de dadîya xo ra bîyo. Erdewan Zaxoyî şertanê xizanîye ra nêeşkeno biwano. Ey domanîya xo de dest pê muzîkî kerd û 1970 de bi assolîstê koma 'Newrozê' ke Zaxo de şinasîyayêne. 1978 de wexto ke 21 serre bi kaseta xo ya verêne weşanaye. Ey verê xo da Bexdadî û o bi venganê bêhempayan ê radyoyan ra yew.

Erdewan Zaxoyî ra ber serra 1970î de hunermendêkê bînî yê Zaxoyî zî verê xo da Bexdadî: Eyaz Yûsif (Zaxoyî). Eyaz Yûsif Ehmed 1961 de dadîya xo ra bîyo. Ey dibistana leşkerîye ya artêşa Iraqî de perwerde dî û bi efserêk. Dima ke têgêrayîşê azadîye yê Başûrê Kurdîstanî serranê 1970an de derbê giranî werdî, o 1977 de bi solîstê koma 'Ciwanên Duhokê.' Eyaz Yûsifî zî radyoyê Bexdadî de deyîrî vatî û 1982 de kaseta xo ya verêne weşanaye.

Serranê 1980an de mabênê hêzanê azadîya Başûrî û artêşa Iraqî de şerê giranî qewimîyayêne û pêşmergeyan xo apey antbi Rojhelatê Kurdîstanî. Erdewan Zaxoyî zî nê pêşmergeyan ra yew bi. Erdewan Zaxoyî ê serran de tepişîya û dima ke vera dîya zî derbazê herêma Cizîre ya Vakurê Kurdîstanî bi.

Erdewan Zaxoyî ê serran de kadroyê PKKyî şinasnayî û kesatêka xo de deyîrêka xo de qala nînan kerde. Zaxoyîyî na kaseta xo şawite Koma Berxwedanî. Erdewan Zaxoyî 1985 de agêra Zaxo la reyna hetê rejîmê Iraqî ra tepişîya û îşkenceyê giranî ra dima vera dîya.

Eyaz Yûsif zî hedefê rejîmê Saddam Huseyînî de bi. Eyaz Yûsifo ke nêweşê Tuberkulozî bi, Nêweşxaneyê Leşkerî yê Musilî de tedawî bîyêne. 25ê çeleyê 1986î de hêzanê rejîmî jehr da ey û çend rojan ra dima Eyaz Yûsifî 26ê çeleyê 1986î de dinyaya xo bedilnaye. Goreyê qiseyanê keyeyê ci, Eyaz Yûsifî rê amebi ferzkerdene ke gonîye bido hêzanê dewlete. Wexto ke ey gonî dayêne ame jehrkerdene.

Hêzanê dewleta Iraqî 28ê çeleyê 1986î de serrgêra ronîyayîşê Radyoyê Bexdadî de Erdewan Zaxoyî rê vat: ''Ma do xelate bidê do'' û venga ey da. Erdewan Zaxoyî a şewe 28-29ê çeleyî de otêle ra ame remnayene û dima tira xeberêke nêameye girewtene. Goreyê tay çimeyan Erdewan Zaxoyî seba ke pasaport bigêro şîyo Bexdadî la tîya de ameyo destbendkerdene û ameyo qetilkerdene. Cayê cenazaya ey nêzanîyeno.

Eyaz Yûsifî mîyanê 25 serran de 4 kasetî viraştî û bi desan deyîrî vatî. Erdewan Zaxoyî hîna bişens bi. Erdewan Zaxoyîyî 20 kasetî amade kerdî û bi desan deyîrî vatî. Xeylêk deyîrê Erdewan Zaxoyîyî hetê hunermendanê dewleta tirke ra ameyî diznayene û açarîyayî tirkî ser. Deyîra ey 'Nazê Nazo' hetê Îzzet Altinmeşeyî ra ame kerdene 'Nazey', deyîra ci ya bîne ''Silavan li min dikî" hetê Îbrahîm Tatlisesî ra ameye kerdene ''Hiş hişi hançer.''