Di kitabê kirdkî yê neweyî vejîyayî. Kitabê domanan 'Kilîle û Dimne' Weşanxaneyê Morî Zarokî ra û kitabê 'Ez û Vate' yê Roşan Lezgînî zî Weşanxaneyê Roşna ra vejîyayî.

Kitabê 'Kilîle û Dinme' hetê Alî Aydin Çîçekî ra kirdaskî ra ame açernayene kirdkî ser. Daşinasnayîşê kitabî de nê agahîyî dîyayî:

''No kitab nêzdîyê di hezar serrî verê cû hetê Beydebayî ra bi ziwanê hindûyan yê kanî, bi sanskirîtkî ameyo nuştene. Bingeyê estanikanê Kilîle û Dimneyî, exlaq û edaletî ser o ameyo awankerdene. Estanikî fabl ê û bi ziwanê şîretkî ameyê nuştene. Eser nameyê xo, her di qehremananê kitabî “Kilîle û Dimne”yî ra gêno, nê her di nameyî nameyê di çeqelan ê. Kilîle fehm (feraset), rastî û zanayîşî sembolîze keno, Dimne zî sembolê çewtî, bexûdî (xirabî) û zur o. Kitab eslê xo de “15 beşan” ra yeno pê, labelê no kitab estanikê fablî yê ke eserî de ca gênê, tenya înan ra yew weçînite yo. Heta nika no kitab açarnîyayo xeylê ziwananê dinya ser.''

Kitabê ''Ez û Vate'' yê Roşan Lezgînî di qisman ra yeno pê. Qismê yewinî de Roşan Lezgîn xebatanê standartkerdişî yê Grûba Vateyî ser o rexneyanê xo ano ziwan. Qismê diyînî de zî Roşan Lezgîn cewab dano tay polemîkan ser.