Rojnameyê Serxwebûnî temamîya perspektîfo ke Rayber Apoyî erşawitibi Kongreya 12ine ya PKKyî û belgeyê kongre pêro humara gulane (hûmara 521ine) de weşanayî. Serxwebûnî pare kerd  ke peynîya weşanê xo yo bêmabên o 44 serrî ardo.

Na hûmare de derheqê cuya Alî Haydar Kaytan û Riza Altunî de nuşteyî zî est ê. 

Rayber Apo bi perspektîfê 20 rîpelan û mektuba 4 madeyan beşdarê Kongreya 12ine bi. Rayber Apoyî perspektîfê xo de vat: ‘’Nê kombîyayîşê ma bi xo zî beno ke nêmeyê çareserîye bibê. Nika ra pey ganî xîretêko cewherî û ercîyaye est bo. Hêvî û bawerîya mi bi serkewtişî pîl a.’’ Rayber Apoyî derheqê dewrê neweyî de 7 madeyî rêz kerdê ke wina yê:

1- Xoza û mana

2- Xozaya komelkîye û mesele

3- Mîyanê komelê tarîxîyî de pawitişê dewlete û komunîstbîyayîşî

4- Modernîte

5- Raştîya kurd û Kurdîstanî

6- PKK û feshkerdiş

7- Perspektîfê dewrê neweyî

Rayber Apo wexto ke perspektîfê dewrê neweyî pêşkêş keno vano; ‘’Meseleya feshkerdişî ma rê rojdemêko newe nîyo. Newe ra awanbîyayîş wina beno. Seba ke proses bi tesîrî şoro û bireso netîce ganî merdim ecele nêkero. Pespektîfê ma yê dewrê neweyî bingeyê neteweya demokratîke, ekonomîke û komunalîzme de newera awankerdişê komelî yo. 

Ma kokanê îdeolojîkan, bernameyê pratîkî û terefanê ameyoxî awan kenê. Komelo demokratîk bernameyo sîyasî yo; dewlete armancê ci nîyo. Sîyaset sîyaseto demokratîk o. Komun bi xo komuno demokratîk o. Raşt nîyo ke nê yewbînan ra cîya bibê. Komelo komun demokratîk o. Sosyalîzmo demokratîk zî yeno manaya komelê demokratîkî. 

Seba derbazbîyayîşê modernîte û sosyalîzmê reelî ma xîret kerd ke analîzêko newe, teorîyêka sosyalîste biafernê. Nameyê ci ma kerd Modernîteya Demokratîke. Ma sîstemê xo yê komelê azadîgîrî hîrê kokan ê sey Modernîteya Demokratîke pênase kerd, nuşt û ma dî ke astêka girînge de komelî ra cewab gêna.

Armancê dewrê neweyî tena seba kurdan û Kurdîstanî ney seba herême zî serkewtişê girîngî do bîyarê. Serkewtişê ney do tesîrê Sûrîye, Îran û Iraqî zî bikero. Komara Tirkîya do biba wayîra ê şensî ke hem xo newe bikera, bi demokrasîyî tacîdar bikera hem zî serkêşîya herême bikera

Ez eşkena vaja ke qîmetê kesanê dûştan ê prosesî çin o. La seba caardişê ney mesuldarîye kewena ma milî. Rixnê netîceyanê herêmîyan ê nê prosesî netîceyê ci yê enternasyonelî zî do est bê. Konfederalîzmê Herême sey îhtîyacêko mutleq vernî de yo. La na çareserîye heman wextî de enternasyonelêkê neweyî ferz kena.’’

Rayber Apoyî bi nê hawayî dest bi mektuba xo ya tarîxî ya 27ê nîsane kerdo:

‘’Embazê ercîyayeyî!

52 serran, mengêke û hewteyêkî ra dima ma bi hawayêkê fermîyî dewrêkê tarîxîyî xo pey de verdanê. Bi manayêka bîne ma wazenê ke sosyalîzmê komelê demokratîkî bîyarê. Çunke peynî û destpêkê her çî est ê.’’

Serxwebûn bi na hûmare peynîya weşanê xo yê 44 serran zî ard o û wendoxanê xo ra xatir waşt.