Festîvala Govendanê Kurdîstanî ya 35ine 18ê gulane de roja şemeyî şaristanê Esslingenî yê Almanya de dest pêkerdbî. 

 Festîvale serkêşîya cinîyan de dewam kena. Ewro 18 komê govende, salona Neckar Forumî de do vejîyê sehne ser. Nika ra kursîyê forumî debîyî.

Nameyê 18 koman wina yê:

Koma Laliş, Govenda Şehîd Sîpan Amara, Govenda Aşê Îwe, Koma Hebûn, Koma Kaniya Spî, Govenda Nêrgîzên Çiya, Govenda Baran, Koma Şehîd Zulkuf, Koma Agirê Welat, Govenda Gelawej, Govenda Romanî, Govenda Baran II, Koma Azadî, Koma Şiyar Jin, Govenda Mezopotamya, Koma Dilçem, Govenda Esteriya, Koma Jiyan.

Endamê Komîteya Amadekarîye Mustafa Şahînî ANFyî rê qisey kerd û ard ziwan ke verê cû cinî û ciwanî şermayêne ke tewrê komanê govende bibê la nika ê serkêşîye kenê.''

Nuştox Fîraz Baranî îfade kerd ke cinîyê kurdî sey waranê cuye, xebat û sîyasetî de warê hunerî de zî serkêşîye kenê. Baranî vat: ''Cinîyê kurdî rêçê Sakîne Cansiz û Arîn Mîrkanan de şinê û erjanê welatî pawenê.''

Emser komî govendanê balkeşan danê şinasnayene. Koma govendanê Gimgimî dîlanê bi nameyê Memyanê, Yawşirme, Zipkiro, Sivikî, Giranî, Serdesta û Yar Kuşte pêşkêş kerdî. Mamostaya kome Gulê êlihî ra ya.

Gulê kêfweşîya xo wina pare kerde: ''1997 de mi dest pê govende kerde. Ez tewra Kampa Govende bîya. Ez govendanê herêmanê Gimgim, Amed, Wan, Riha, Colemêrg, Bedlîs, Agirî û Koçgîrîyî musaya. Dima ez zewijîyaya û lajê mi Dîwan bi. Lajê mi 16 serrî yo û mîyanê nê koman de cagêno. Eke merdimî mîyanê kulturê xo de nêbê do vindî bibê.''