Feleke Yusuf: AKP cinîya azade û wayîra îradeyî ra terseno

Endama Meclîsê Edaletê Cinîyan ê Herêma Firatî Feleke Yusuf serrgêra Qirkerdişê Helincê de vat: ''Qirkerdişê Helincê tersê vera cinîya azade û rayber a.''

23ê hezîrana 2020î de dewa Helincê ya Kobanê de artêşa tirke pê teyarayanê şerî 3 cinîyî Endama Koordînasyonê Kongreya Starî Zehra, endama Meclîsê Kongreya Starî Hebûne û dayîke Yadê Zehra dabi bombayan ver, qetil kerdbi. Endama Meclîsê Edaletê Cinîyan ê Herêma Firatî Feleke Yusuf serrgêra Qirkerdişê Helincê de ANFyî rê qisey kerd.

Feleke Yusuf vat: ''Ma seba yadkerdişê embazan xo amade kerdêne la narey zî dewleta tirke Denîze Poyraz qetil kerde. Hevrîne Xelef, Yadê Aqîde zî hetê dewleta tirke ra kişîyayî. Cinîyî hînî amyeyoxê xo, azadî û estbîyayîşê xo felsefeya Rayber Apoyî de vînenê. Cinîyî Rojawan nê esasî ser o tewrê têkoşînî bîyî û vera DAÎŞî şer kerd. Şorişê Rojawanî de felsefeya Rayberîye reyde rol û îradeyê cinîyan zî şinasîyayî. 

Ma sey cinîyanê Rojawanî mîyanê projeyê neteweya demokratîke ya Rayberîye de ca gênê, xo rêxistin kenê ke no proje çareserîya kaosan a. Coka komplogerî komployanê xo ra fek vera nêdanê. Têkoşînê Îmraliyî yê Rayber Apoyî nê komployî 4 parçeyanê Kurdîstanî de pûç kerdî.''

Feleke Yusuf ard ziwan ke heta nika înan hêrişê cayêkî nêkerd hertim çarçewa pawitişê meşrûyî de xo pawit. Feleke vat: ''La Tirkîya tim hêrişê ma kena, erdê ma îşxal kena. Çîyê ke Efrîn, Serêkanîyê, Girê Sipî de ameyî cinîyan ê kurdan ser goreyê exlaqê sîyasetî nîyê. Ê hêrişê cinî, doman, xoza û merdimîye kenê. La vera nê kerdişanê AKP û Tirkîya bêvengîyêka pîle esta. Semedo ke cinîyan xo war de îsbat kerdo ê hêrişê cinîyan kenê. Cinîyanê Rojawanî rayberîya xo pêro dinya rê îsbat kerd. Xora projeyê neteweya demokratîke verê menfaatanê hêzan ê serdestan û kapîtalîstan asteng o. Coka ê bi taybetî hêrişê cinîyan, cinîyan ê rayberan kenê.

Dewleta tirke pê Qirkerdişê Helincê waşt ke zerrîya cinîyan ê xoverdayoxan de ters biaferna. Labelê hêrişê winasênî qerardarîya ma kenê pîlêr. Sey cinîyan vera nê hêrişan cewabê ma do xurtkerdişê têkoşînî bibo. ''