Festîvala Fîlman a Dusseldorfî ya Yewine bi fîlmê 'Rojbaş'î dîyaye destpêkerdene. Almanya, Belçîka, Swîsre û Danîmarka ra heskerdoxê sînema û namdarê kurdan tewrê festîvale bîyî.

Mojnayîşê fîlmê Rojbaşî ra verê cû derheqê rewşa êzidîyan de panelêk ame serûberkerdene.

Panel de rojnamegere Aysele Avesta vist vîrî ke tewr tay 100 reyî êzidîyî raştê fermanan ameyê la rixmê ney zî êzidîyan tim bawerîya xo pawite. Aysele bale ante ser ke Fermanê Şingalî de şerwananê YPG-YJA-Starî û gerîlayanê HPGyî êzidîyî pawitê. Aysele Avesta peynîya qiseykerdişê xo de venga pêro dewletan da ke wa Îdareyê Xoserî yê Şingalî bişinasnê.

Dima salona sînema ya UFA Palastî de, fîlmê Rojbaşî ame mojnayene. Dîrektorê fîlmî Ozkan Kuçuk û kaykerdoxê fîlmî zî tewrê mojnayîşî bîyî.

Mojnayîşê fîlmî ra ver Komîteya Amadekarîye bi kirdkî û kurmanckî eşkerayîyêke daye û vat: ''Sînameya ma sînemaya şarî ya.''

Mojnayîşê fîlmî ra dima Dîrektor Ozkan Kuçukî pare kerd ke dima ke qeyûm tayînê Şaredarîya Amedî ameyo kerdene hunermendanê tîyatroyî ancî zorîyê serranê 90an antê û sey serranê 90an xo ver dayo.