Festîvala Gimgimî: Dinya ke merdim pê rengê xo tede ciwîyeno rind a

Gimgim de Festîvala Bawerî û Xoza ya Mekanê Xizirî ameye kerdene. Hemserekê DADî Musa Kuluyo ke tewrê festîvale bi vat: ''Dinya ke merdim pê reng, ziwan û bawerîya xo tede ciwîyeno rind a.''

Qezaya Gimgimî ya Mûşî de  Festîvala Bawerî û Xoza ya Mekanê Xizirî ameye kerdene. Wekîla HDPyî ya Mûşî Gulîstane Kiliç Koçyigit û Hemserekê Pêroyî yê DADî Musu Kulu zî tede xeylêk sîyasetmedar û îdarekatê rêxistinanê sîvîlan tewrê festîvale bîyî.

Roja diyên a festîvale de serê sibayî Gola Hamurpetî de têhetameyîşêk ame kerdene û saetanê şanî de merkezê qeza de bi seyan kesî tewrê konserî bîyî û govende girewte.

Bi nameyê Komîteya Amadekerdişî ya Festîvale îdarekarê DADî Îmam Balseverî qiseykerdişê akerdişî kerd. Balseverî vat: ''Rehberîya bawerîya ma de ma do bi pawitişê esasê yewîya xo ya komelkîye tim hetê demokrasî, seyyewbînîye û edaletî de vinderê. Êyê ke mekananê ma yê ke ma tede îkrar danê teslîmê destan û linganê leyminan kenê ma do vera înan de vinderê.''

Dima ra Hemserekê Pêroyî yê DADî Musa Kuluyî qisey kerd. Kuluyî vat: ''Eke bawerîye û nasnameyî reng, ziwan û vîrê xo yê tarîxîyî vînî bikerê merdimîye zî vînî kena. Dinya ke merdim pê reng, ziwan û bawerîya xo tede ciwîyeno rind a. Bawerîya ma elewîyan serê di kerrayanê esasan ser o ya. Înan ra yew îkrar o yew zî rizatîye ya.''

 Wekîla HDPyî Gulîstane Kiliç Koçyigit zî vat: ''Seba ke vîjnayîş bîyo nizdî elewîyî ameyî vîran. Cemxaneyanê ma nas nêkenê, domananê ma pê  dersa dînîya mecburîye asîmîle kenê, xoza, bawerî û kulturê ma çîn hesibnenê û nêşarmîyenê  wextê vîjnayîşî benê heskerdoxê elewîyan. Ma malzemeyo sîyasîyî nîyê. Destê xo serê xoza, cemxane, kultur û bawerîya ma ra biancê. Yezîd Kerbale de nêmend, ewro zîhnîyetê ey mazlûman qetil keno.''

Badê qiseykerdişan hemwelatîya bi govende girewte. Festîval bi zîyaretê turbeyan û vilakerdişê loqmayan biqedîyo.