Festîvala Kulturê Dêrsimî ya Ewropa ya 12. şaristanê Frankfurtî yê Almanya de ameye kerdene. Festîvale hetê Federasyonê Elewîyan ê Demokratîkan (FEDA), Federasyonê Yewinanê Dêrsimî yê Demokratîkan ê Ewropa (ADEF) û Kongreya Înşa ya Dêrsimî (DÎK) ra ameye serûberkerdene.

Festîvala Dêrsimî ya ke xeylêk kesî tewrê ci bîye rojî dewam kerde.  Roja verêne de ca dîya panel, dokument û cemê muhabetî. Roja diyîne de fîlmo dokument ê 'Vêşnayîşê Dewanê Dêrsimî yê 1994î' ame mojnayene. Programê sehneyî bi gulbanganê Pîr Alî Balî û Narîne Ana ame kerdene.

Koma Stêra Muzîk, Koma Mûnzûr, Beşere Şahîn, Dogan Çelîk, Lale Koçgun, Mîkaîl Aslan, Levent Ozdemîr, Serhad Med, komên varvara û ya def û zurna vejîyayî serê sehneyî.

Îdarekaranê dezgehanê organîzatoran ê festîvale şaro ke tewrê fesîtvale bi, selam kerd.  Hemsereka DÎKî Hulya Yerî vat: ''Qirkerdişê Dêrsimî ewro Herêmanê Pawitişî yê Medya dewam keno. Ewro zî xoverdayîş dewam keno. No mîrasê têkoşînî Alîşer û Zarîfeyan ra heta Sakîneyan û Aysele Doganan hetê bi hezaran qehremananê bênameyan ra yeno domnayene.''

Serekê DEDEFî Ozkan Tacerî zî vat: ''Hêrişê vera Dêrsimî zêdîyenê.  Vera ziwan, kultur û xozaya ma hêrişê yenê kerdene. Ganî ma Ewropa de yewîya xo xurtêr bikere û vera hêrişan vejîyê. Ganî nameyê Dêrsimî peyser bêro dayene,  belgeyê 1937-38î bêrê eşkerakerdene û aqibetê kênayanê vînbîyayeyan bêro eşkerakerdene. Reyna ganî dewlete Terteleyê Dêrsimî de bêro têrî.''

Serekê AABKyî Huseyî Mat zî  ard ziwna ke ganî komelê elewîyan hinî her her warî de bêro têhet û vera hêrişan vejîyo û vat eke ma bibê yew ma eşkenê ser bikewê. Parlamenterê HDPyî Kemal Bulbulî zî bale hêrişanê vera Dêrsimî ser û vat Dêrsim xoverdayîş o.

Badê qiseykerdişan kulturê veyveyê Dêrsimî ame ramojnayene. Standanê festîvalî zaf eleqe ant xo ser. Eleqeyo tewr pîl kitaban rê estbi.