Federasyonê Elewîyan ê Demokratîkan (FEDA), Federasyonê Yewinanê Dêrsimî yê Demokratîkan ê Ewropa (ADEF) û Kongreya Înşa ya Dêrsimî (DÎK) bi eşkerayîye da pêhesnayene ke do Festîvala Kulturê Dêrsimî ya Ewropa ya 13. do 26-27ê gulane de, şaristanê Frankfurtî yê Almanya de bêra kerdene.

Eşkerayîye de nê ameyî vatene: ''Dewleta tirke semedê qirkerdişan kerdo xo çeng. No zîhnîyetê xo dimayê erdlerzê 6ê sibate zî ramojna. Hem verê erdlerzî wezîfeyê xo nêerd ca û tedbîrî nêgirewtî hem zî badê erdlerzî berpirsîyarîye ra remaye. Hetê bînî ra verê hetkarîya rêxistinanê komelê sîvîlî û rêxistinanê demokratîkan ê girseyî bîgêro ke qirkerdiş kurd-elewî û ereb-elewîyan bido ciwîyayene. Ma bi des hezaran gananê xo ke rîyê îqtîdarê AKP- MHPyî ra dinyaya xo bedilnaye, bihurmet yad kenê û festîvala xo dîyarîya înan kenê.

Dewlete herinda têrîameyîşê qirkerdişanê verênan de û hesabdayîşî de semedê qirkerdişanê neweyan kerdo xo çeng.Wazenê herêmanê elewîyan û kurdan veng bikerê ke şarê ma rê înkar û asîmîle ferz bikerê.Coka ma pê festîvala xo wazenê vera qirkerdişê fîzîkî û kulturkî wayîrê ziwan, kultur, bawerî, nasname û estbîyayîşê xo bivejîyê.

Na çarçewe de ma wazenê bi şîarê 'Dewleta tirke qirkedişan reyde bê têrî, Terteleyê Dêrsimî nas bikerê 'şaran, bawerîyan û hetanê komelkî yê ke cografyaya Dêrsimî de ciwîyenê, bîyarê têhet. Ma wazenê pîya klaman û lawikanê xo vajê  û kultur û bawerîya xo bikirişê sibayan. Ma wazenê ziwanê xo dayîke de deyîran vajê, lawik û dejanê xo bikerê hempar, pîya bi roşnvîr û nuştoxanê xo tarîtîye rê bibo roşnayî.''