Bajarê Frankfurtî yê Almanya de Festîvala Kulturê Dêrsimî ya 14ine ameye kerdene. Festîvala ke hetê Federasyonê Elewîyan ê Demokratîkan (FEDA), Federasyonê Yewîyanê Demokratîkan ê Dêrsimî  (ADEF) û Kongreya Awankerdişî ya Dêrsimî (DİK) ra ameye organîzekerdene bi panelê ''Dêrsim de Cinî û Ekolojî'' dest pêkerd.

Panelo ke moderatorîya ci Hulya Yer kerde Cigêrayoxa Ekolojîste Leyla Binici, Perwerdekare Elîf Akgul Ateş û Aktîvste Hatîce Tosun sey qiseykerdoxe tewrê ci bîyî.

Elîfe Akgul Ateş qiseykerdişê xo yê kirmankî de qalê qirkerdişê vera cinîyan ê Dêrsimî kerd. Ateşe vist vîrî ke terteleyê 1938î de xeylêk cinîyî ameyî qetilkerdene û xeylêk zî teberê bajarî de dîyayî keyeyanê xerîban ke wa ziwan, kultur û bawerîya xo ra bêrê raqilnayene û asîmîlekerdene û vat Dêrsim de pîya bi ziwan, bawerî û kultur xoza zî ameye qirkerdene.

Reyna qiseykerdoxanê bînan zî bale ante zextanê vera ziwan, kultur û bawerîya Dêrsimî ser û vat bi zextan û kayanê leyminan yeno waştene ke şarê Dêrsimî erjanê xo ra bêro dûrîfînayene la dêrsimijê xoverdayoxî sey virêzî ewro zî vera zextan wayîrê erjanê xo vejîyenê û sereberz têkoşîn kenê.

Badê panelî program bi aktîvîteyanê kulturî dewam kerd.Festîvale de hunermend Burhan Karakaş û Gule Meyara vejîyayî sehne û deyîrî vatî.

Reyna bi nameyê dezgehanê elewîyan înanê ke festîvale organîze kerde, qiseykerdişî ameyî kerdene. Qiseykerdişan de polîtîkayê qirkerdişî ameyî şermezarkerdene û semedê wayrîvejîyayîşê bawerî, ziwan û kulturî ame vengdayene.

Wekîla Partîya Çepe  Gokaye Akbulut zî tewrê festîvale bîye. Akbulute şarê Dêrsimî selam kerd û bale ante paştdayîşê enternasyonalî ser.

Veyveyê  Dêrsimî zî zaf bale ante xo ser û Pîr Huseyîn Bîldîkî gulbang wendî. Dima ekîbê folklorî vejîya sehne.

Festîvale de mesajê Paştdayîşê Cinîyan ê Ewropa semedê hewteyê hezarin ê Mayanê Şemeyî ame wendene. Dima hunermend Veysel Aydin vejîya sehne.

Komîteya Festîvale da zanayene ke înan Hemşaredara Dêrismî Bîrsene Orhan semedê festîvale dawet kerde la vîze nêdîyaye ci û no caardiş şermezar kerd.

Serekê Pêroyî yê DEDEFî Ali Riza Bîlîrî  ard ziwan ke bi polîtîkayanê qirkerdişî yeno waştene ke Dêrsim bêro vengkerdene û vat ê do destûrê nê medê.

Wekîla DEM Partî ya Dêrsimî Aytene Kordu zî tewrê festîvale bîye. Aytene Kordu vat: ''Çîyo ke Dêrsimî keno Dêrsim îtîqat, bawerî û ziwanê ci yo. Ganê ma ke tîya de wa wayîrê kulturê xo bivejîyê. Ma zanê ke wazenê ma erjanê ma ra raqilnê. Wazenê Awanîya demokrafîk û komelkî, nasname û ziwanê ci bibedilnê. Coka teberî ra xerîban anê. Vera ekolojîya herra Dêrsimî  hêrişo pîl est o. Têkoşînê ma zaf hetin herra ma de dewam keno. Ma tîya ra xoverdayîşê zîndanan û dayîkan zî selam kenê. Tecrîd vera ma perûne yeno kerdene. Ma do sereberz têkoşînî rê dewam bikerê.''

Festîvala Kulturê Dêrsimî bi govende û muzîkî dewam kerde.