Festîvala Kulturê Kurdan a Parisî ya 2. vizêr dest pêkerd û heta 12ê gulane do dewam bikera. Festîvala emserîne dîyarîya Evîne Goyî, Mîr Perwer û Abdurrahman Kizilî ameye kerdene.

Akerdişê festîvale Şaredarîya Parisî ya 10. de ame kerdene. Akerdiş de deyîrê Mîr Perwerî ameyî goşdarîkerdene. Nameyê CDK-Fyî ser o Bêrîvane Firat qisey kerd û derheqê kulturê kurdan de qisey kerd. 

Senatorê Parisî Remi Feraud, Senatora Partîya Komunîste Laurence Cohen, Endamê Meclîsê Parisî Ellie Joussellin, Sereka France Kurdistanî Sylvie Jan, Serekê Acortî Umît Metîn, temsîlkarê dezgehê Keldanî, Federasyonê Cinîyan ê Kabilî, Actit û selahîyetdarê Şaredarîya Sarcellesî zî tede xeylêk kesî tewrê akerdişî bîyî.

Senatorê Parisî Remi Feraudî akerdişê festîvale de vat: ''Şaredarîya Parisî ya 10. keyeyê kurdan o. Şaredarîye de pêşwazîkerdişê merasîmêkê winayênî rûmet o.''

Akerdişê festîvale de Koma Govende ya Rojbîne, Merale Alkan û Ulaş Kelaşîn vejîyayî sehne ser. 

Bernameyê festîvale wina yo:

7-8ê gulane de Komeleya Kurdan de taşte do bêro dayene û 8ê gulane de zî banlîyoyê Sarcellesî de kayê tîyatroyî do bêro mojnayene.

9ê gulane de banlîyoyê Bobignyî de şewa dengbêjan do bêra kerdene.

10ê gulane de seba domanan fîlmo anîmasyon ''Darên Bi Tenê'' do bêro mojnayene.

11ê gulane de pêramotişê ''Jin, Jiyan, Azadî'' est o.

12ê gulane de merkezê Parisî de Koma Bajarî, Mehmet Atli û Rûkene Yilmaz do vejîyê sehne ser.