Festîvala Tîyatroyî ya Mîtanî ya ke taybetîyanê kulturî yê şarê kurdan bi kayanê tîyatroyî mojnena ra û 3 reyî Efrîn de ameye kerdene, emser rîyê îşxalê dewleta tirke ra Şehba de ameye kerdene. Festîvale ra ver Şehba de karnavala kincanê tradîsyonelan ameye kerdene. Her serre festîvake de deyîra ''Ma cuye romenê'' bi kurdkî, erebkî û fransizkî yena vatene û komê tîyatroyî kayanê xo mojnenê. Festîvala Tîyatroyî ya Mîtanî ya 4. zî 14 rojan dewam kerd.  

Armanco serek ê Festîvala Tîyatroyî ya Mîtanî dinya rê daşinasnayîşê kultur û hunerî yê kurdan o. 

Serra 2018î de dewleta tirke ya îşxalkere û cerganê ci hêrişê Kantonê Efrînî kerd. Îşxalê Efrînî de 300 hezarî ra zêdêr efrînijî neçare mendî ke koçê Şehba bikerê. Her çiqas şert û mercê koçberîye zor bibê zî amadekarîya festîvale dewam kerd û 26ê çeleyê de Festîvala Tîyatroyî ya Mîtanî ameye kerdene.

Kayê festîvale hîna zêdêr xoverdayîşê kurdan ser o bîyî. Festîvale de bi temamî 60 kayî ameyî mojnayene.

Festîvala Tîyatroyî ya Mîtanî ya 4. de hîşmendîya komelî ser o ame vindertene û bale ameye antene hêrişanê vera kultur û hunerî yê kurdan û kurdkî ser.

Komîteya Amadekarîya Festîvale ra Mihyedîn Arslan vat: ''Festîvala yewîne ya 2014î zaf weş vîyarte. Serra 2018î de dewleta tirke seba ke kulturê kurdan çin bikera hêrişê Efrînî kerd. Wezîfeyê ma pawitişê kulturê kurdan o. Nê esasî ser o ma festîvala xo ya 4. kerde. Ma hêvî kenê ke festîvala ma ya 5. zî do biba festîvalêka mîyanneteweyîye.''