Festîvala Xoza û Kulturî ya Munzurî ya 20. bado ke di serrî rîyê janê Korana ra nêamebî kerdene emser do mabênê 21-24ê temmuze de bêra kerdene.

Walîtîya Dêrsimî rayraşîyayîşê ver bi Meydanê Seyîd Rizayî, konserê Grup Yorum û Grup Îsyan Ateşî qedexe kerdî.

Komîteya Amadekarîye yê Festîvala Munzurî vera qedexeyê Walîtîye  heyeta kombîyayîşî yê Şaredarîya Dêrsimî de eşkerayîye daye. Serekê Şaredarî Fatih Mehmet Maçogluyî ke eşkerayîye de qisey kerd vat: ''Ma zîhnîyetê qedexekerdoxî qebul nêkenê û seba ke bi qeraranê keyfînî qerarê qedexeyî ameyo girewtene ma do programê xo senî ke ameyo organîzekerdene bîyarê ca. Grup Yorum û Grup Îsyan Ateşî do Meydanê Seyîd Rizayî de deyîranê xo vajê û rayraşîyayîş zî senî ke ameyo plankerdene do bêro kerdene.''