Fîlmo dokumenter 'Mahpus ya da Surgun' (Gefängnis oder Exil)o ke qala prosesê peyê operasyonê qirkerdişê sîyasî keno şaristanê Bernî yê Swîsre de ame mojnayene. Fîlmê dokumenterî de Wekîla HDPyî Nursele Aydogana ke wekîlîya ci amebî xespkerdene, Hemşaredarê Amedî Firat Anli û Hemşaredarê Kayapinarî Zulkuf Karatekîn ê ke herinda înan de qeyûm amebi tayînkerdene qala prosesî kenê.

Dîrektorîya dokumenterî Şerîf Çîçekî û produktorîya ci zî Adil Demîrcî û Onur Gulerî kerde.

Mojnayîşê dokumenterî ra dima bi beşdarîya Firat Anli, Adil Demîrcî, Wekîlê Partîya Keskan Haşîm Sancarî, Encumena Şaredarîya Bernî Yeşîm Ekîcî, Tuncay Yilmaz, Hemşaredarê verênî yê Êlihî Nejdet Atalay, Serekê verênî yê KESKî Lamî Ozgenî û hemserekanê Merkezê Komelê Demokratîkî yê Bernî xoşebere ameye kerdene.

Firat Anli û nuştox Demîrcî xoşebere de qisey kerd. Anliyî vist vîrî ke hêrişanê DAÎŞî ra dima HDP wayîrê Kobanê vejîya coka 2014 ra dima vera ci hêrişî dîyayî destpêkerdene. Anliyî vat: ''Ma o çax maruzê cezaya zîndan û surgunî mendî. Nê hêrişî vera modelê cuya demokratîke û sîstemê hemserekîye ameyî kerdene.''

'Mahpus ya da Surgun' (Gefängnis oder Exil)5ê teşrîna peyêne de Zurih û 18ê teşrîna peyêne de zî Lozan de do bêro mojnayene.