Fîlmê 'Gava Şitil mezin dibin' ewro weşanîyeno. Fîlm xîret keno ke fedakarî, kede, parekerdiş û hezkerdişê Şorişê Rojawanî mojneno. Fîlm ewro Merkezê Kulturî yê Baqî Xidoyî yê Kobanê de yeno mojnayene.

Dîrektorê fîlmî Rêger Azad Kayayî ANFyî rê qala fîlmî kerde. Kayayî pare kerd ke înan waşto ke îdealanê şorişgêran bi rayîrê hunerî bîyarê ziwan û vat: ''Mi 2019 de dest pê nuştişê hîkayeya fîlmî kerd. Denîze Derya û M.Emîn Engîzekî zî senaryo nuşt. Hamnanê 2019î de ma dest pê antişê fîlmî kerd. Fîlm qala keyeyêkî keno; babî û kênaya ci her roje dewe ra yenê û mast roşenê. Nê babî û kêna raştê xortêkî yenê û pîya raywanîye kenê. Na raywanîye a raşte qala raywanîya Şorişê Rojawanî ya. Bi na hîkaye ma portreyê şorişî vînenê.

Rojawan de ma nêeşkayî kaykerdoxanê profesyonelan bivînê. Kesê ke karakteranê Zelale (kêna), Hemud (ciwan) û Huseyînî (babî) kay kenê, a raşte heman keyeyî ra yê. Zelale û Hemûd way û bira yê, Huseyîn zî apê înan o. Seba ke ê kaykerdoxê amatorî bîyî xora ma tay zehmetîyî antî. La ma xîret kerd ke raştîyan seyci bimojnê. Fîlm de ma xîret kerd ke cuye û şorişî bi çimanê domanan bivînê. Xora domanan mîyanê şorişî de rolê pîlî ardî ca. Nika mabênê şoriş û domanan de têkilîyê xurtî est ê.''

Kayayî dîyar kerd ke sînemaya kurdî hewceyê ziwan û metodêkê afernayoxî ya. Kayayî vat: ''Wexto ke ma sey kurdan fîlman gênê armancê ma yo verên bazirganî nê no yo ke fîlm rayaumûmîye rê bêro pêşkêşkerdene.''