Komunê Folklorî yê Rojawanê Kurdîstanî bi rêxistinîya xo 20 şaristanan de folklorî resneno neslanê neweyan. Îbrahîm Hemêyî îfade kerd ke folklor têna reqsêk nîyo û vat: ''Şima eşkenê bi folklorî şarî rê qala kultur û şorişê xo bikerê.''
Komunê Folklorî yê Rojawanî 2015 de Rojawan de ame ronayene. Komun nika 20 şaristananê cîyayan de xo resneno neslanê neweyan. Komun bi taybetî girîngîye dano perwerdeyî.
Perwerdeyê hîrayî yê komunî 2018 de Akademîya Şehîd Yekta Herekolî de dîyayî destpêkerdene. Komunê Folklorî de têna reqsê kurdan nê reqsê ereban zî yenê mojnayene û komun de şarê sûryan, çerkez, tirkmen û erebî zî cagênê.
Berpirsê Komunê Folklorî yê Rojawanî Îbrahîm Hemêyî ANFyî rê qisey kerd û dîyar kerd ke folklor mîyanê şaran de yewîye aferneno. Hemêyî vat: ''Wexto ke merdimî destê xo danê pê hînî benê yew. Nika seba ke ma kulturê folklorî yê her parçeyanê Kurdîstanî serwer bikerê cigêrayîşan ganî bikerê. Têna daşinasnayîşê folklorê Rojawanê Kurdîstanî qîm nêkeno. Coka ma wazenê projeyanê xo yê serê folklorî bizêdînê.''
Hemê pare kerd ke folklor têna reqsî ra îbaret nîyo û vat: ''Her komînêko folklorîk wayîrê manayêkî yo, qala tarîxêkî vano û wayîrê vîrameyîşî yo. Bi rayîrê folklorî merdim eşkeno qala kulturê xo yan zî şorişê xo bikero.''
