Fîlmo dokumenter 'Hêza' yo ke Derya Denîz dîrektorîya ci kerda, Festîvala Fîlman a Mîyanneteweyîye ya 'Film in Focus' a Bukreşî de layîqê xelata fîlmê dokumenterî yê tewr weşî ame dîyene.

Hêza verî zî festîvalanê Boden, Druke, Los Angelesî de xelatî girewtbî. Bi xelata Festîvala Bukreşî Hêzê heta nika çar reyî xelata fîlmê dokumenterî yê tewr weşî girewte.

Hêza qala cinîyêka êzidîye kena ke destê DAÎŞî ra remena û dima Reqa de mîyanê hêzanê YPJyî de vera DAÎŞî şer kena.

Dîrektore Derya Denîz ard ziwan ke ê nê pêro xelatan dîyarîya şarê kurdî, kurdanê êzidîyan û bi taybetî cinîyanê Şingalî kenê ke rojanê zehmetan de zî tim xo ver danê.

Fîlmo dokumenter Hêza menganê temmuze û tebaxe de, Portekîz, Almanya, Îsraîl, Amerîka û Îngilîstan de do bêro mojnayene.