TEV-ÇANDî derheqê denbêjê kurdî yê namdarî Evdalê Zeynikê de kayêkê tîyatroyî amade kerd. Amadekarîyê kayî 6 mengan de qedîyayî. Kay de 26 kaykerdoxî cagênê. Kaykerdoxê kurd, ereb û brezîlyayîjî zî tewrê tîyatroyî bîyî.

Kay 31ê teşrîna verêne de Rimêlan de do bêro mojnayene, 3ê teşrîna peyêne de Qamişlo de û 7ê teşrîna peyêne de zî Dêrik de do bêro mojnayene.

Dîrektorê kayî Osman Kurtalanî derheqê kayî de ANFyî rê qisey kerd û vat: ''Evdal tarîxê kurdan de sey Homerosê kurdan şinasîyeno. Xeta îxanet û xoverdayîşî ya kurdan hîkayeya Evdalê Zeynikê de ganî bena. Kêm maneno ke o têna sey dengbêjêkî dîyeno şinasnayene. Evdalî îxanet red kerdo û xo ver dayo. Na efsane de îxanet û xoverdayîş pîya est ê.''

Kurtalanî peynîya qiseykerdişê xo de îfade kerd ke Rojawan de hewceyê tîyatro û hunerê bînî zaf ê. Kurtalanî vat: ''Hayîya TEV-ÇANDî pê ney est a. Coka beşêkê Koma Tîyatroyî ya Çîyê şawit Rojawanî. Tarîxê Kurdîstanî ganî pê tîyatro û hunerê Şorişê Rojawanî bêro vatene.''