Hunermenda kurde Hozane Mizgîne (Gurbete Aydin) serrgêra 32ine ya şehadetê xo de ameye yadkerdene.

Qezaya Tetwanî ya Bedlîsî de Hozane Mizgîne serê gorê xo de ameye yadkerdene. Wekîlê DEM Partî Huseyîn Olan, îdarekarê DEM Partî yê Bedlîsî û Tetwanî, Komeleya Kultur û Hunerî ya Serhatî tewrê yadkerdişî bîyî. Yadkerdiş de deqayêk rêz ame girewtene û duayî ameyî wendene.

Qezaya Peyasî ya Amedî de Koma Jin Ma seba yadkerdişê Hozane Mizgîne Tîyatroyê Şaristanî yê Amedî de konserêk da. Hemşaredarê Amedî, Hemşaredara Bajarê Nû Safîye Akdag, Hemşaredara Sûrî Gulane Onkol, Hemşaredara Rêzanî Leyla Ayaz û endamê Meclîsê Şaredarîye û aktîvîstê TJA zî tewrê konserî bîyî.

Konser de Îdarekara Komeleya Kultur, Huner û Edebîyatê Cinîyan (KASED) Salîha Ayata ard ziwan ke Hozane Mizgîne girîngîye daya têkoşînê cinîyan.

Aktîvîsta TJA Mekîye Ormanci pare kerd ke bi muzîk û hunerê xo înkarkerdişê kurdan red kerdo. Mekîye vat: ''Hozane Mizgîne bîye roşnîya kulturê ma. Ma do têkoşînê roşnîya kulturê kurdan Hozane Mizgîne teqîb bikerê.''

Qiseykerdişan ra dima Koma Jin Ma vejîyaye sehne ser.