23 serrî hucre de ciwîyayîş çîyêko senîn o? ''Hucreyo ke şewa ci çîn a'' (La celda sin noche) nê perseno. Ciwîyayîşê tecrîdî yeno çi mana û şertanê tewr zehmetan de têkoşîn senî yeno afernayene, nê ser vindano.

Kayo ke 2019 de hetê Galler Irustayî ra ame nuştene û emser hetê rejîsor Mireia Gabilondoyî ra yeno kaykerdene çar dêsanê hucreyî kireşeno sehneyî û mojneno ke cuya merdimî ke warê tewr qijî de yeno hepskerdene sey çilaya ke çirey nîna hewnakerdene senî bêsînor raştê binpaykerdişê heqan yeno.

''Hucreyo ke şewa ci çîn a'' (La celda sin noche) kayo verên ê Galler Irustayî yo. Rejîsorê sînema û tîyatroyî Irusta 1995 de bajarê Bilbaoyî yê Îspanya de ameyo dinya û Madrîd, Roma û Amsterdam de felsefe û fîlm ser o perwerde girewto. Bi desan fîlmê kilmî yê xoserî nuştî û viraştî. Eynî wextî de tîyatroyanê profesyonelan de sey hetkarê rejîsorî, rejîsor û îdarekarê sehneyî xebitya. Wextê nêzdî de semedê perwerdeyê rejîsorîya fîlman Amerîka de bursê Caixa qezenc kerd.

Irusta bi qalkerdişê hîkayeya Abdullah Ocalanî fîkrê ci yê sîyasîyî yê ke binê tecrîdê giranî de aver berdî geno dest. Kay raywanîya îdeolojîkî yê Abdullah Ocalanî mojeno û tameşekerdoxan fîneno raywanîyêka hîsî.

Hîrê karekterê ke fîkranê Abdullah Ocalanî temsîl kenê bi muneqeşayanê xo mojnenê ke rixmê sînoranê hepsî fîkrî senî azad ê. Na hîkeyaya têkoşînê kurdan bo zî Irusta û Gabilondo nê serê tepişnayîş û têkoşînê Abdullah Ocalanî ra genê dest û hîkayeyêka pawitişê heqanê merdiman kirişenê sehneyî.

Irusta derheqê nê kayî de wina vano: ''Goreyê mi fîkrê sîyasîyî yê Abdullah Ocalanî perspektîfê tewr muhîmî yê serranê peyênan ê. Coka mi waşt ez nê fîkranê ke semedê Ewropa zî muhîm ê, kefş bikerê û pare bikerê. Bi nê kayî têkoşînê Abdullah Ocalanî, binpaykerdişê heqan ê dewleta tirke û dîrîyîya Ewropa dîyenî eşnawitene.''

Irusta persenê sey Yew merdimo ke yew war de ameyo hepskerdene zerrîya ci de se beno? Cayo ke çew bi xo têna tede yo de bedilnayîş senî beno? Nakokî-pêkewtiş, muneqeşe û têkoşînê ke dinyaya zerrîya ma de qewimîyene çîyê? pers keno.

Irustayî vat: ''Ez hêvî kena ke Abdullah Ocalan zano ke senî xebat û cuya ey dinya de yenê wayîrvejîyayene  û parekerdene. Ez sey nuştoxêkê kayî wazena fîkranê ey yê sîyasîyî dinya dir pare bikerî, neheqîya ke ey rê yena kerdene û xoverdayîşê ey bidê eşnawitene. Ez zaf bena şa ke hayîya ey nê kayî ra bibo.Werîkna ey zî no kay bidîyênî.''

Akerdişê kayî San José, Kosta Rika de ame kerdene û adara 2023yî de welatê Baskî de vejîyo turne.