Hemserekîya Konseya Rayberdişî ya KCKyî semedê şehadetê Dayîka Haştîye Sakîna Arat mesajê serweşîye pare kerd.

Eşkerayîye de nê ameyî vatene: ''Ma xebera şehadetê Dayîke Sakîne girewt ke emrê xo da nê têkoşînî, keda xo ya bimbareke, ewladê xo bedel dayî û têkoşînê bianorî yê cinîyan ê kurdan û dayîkanê Kurdîstanî de ca girewt. Ma Dayîka Sakîne ya ke têkoşînê ma yê azadîye de sey yew cinarêre kulturê dayîke yo bimbarek da ciwîyayene, bi çalakîyanê xo dişmen şermna, rîyê dostan wîşna, xoverdayîş da musnayene, bir hurmet  û heskerdişî yad kenê. Ma soz danê ke ma do çarçewaya layiqbîyayîşê aye de têkoşînê haştîye û komelê demokratîkî xurtêr bikerê.

Dayîke Sakîne surgun de ameye dinya û rixmê şertanê surgunî û heme zehmetîyan kulturê xo pawit. Qijê xo sey temsîlkaranê xoverdayoxan ê kutlurê kurdan kerdî pîl. Kulturê xo yo komelkî û ruhê xoverdayîşî da qijanê xo.

Lajê ci Cemal Arat Serra 1984î de Zînadanê Amedî de mend. Tîya bi xoverdayîşo xo yê bianorî nasnameyê kurdan temsîl kerd, bi sembolê qetîbîyayîşê estbîyayîşê kurdan.  Hela ke Cemal Arat rojeyê mergî yê girdî de şehîd bi, Dayîke Sakîne verê sareyê ci de bî. 2 lajê xo yê bînî dayî têkoşînê azadîye yê Kurdîstanî. Bado ke lajê ci dewaya azadîye de şehîd bîyî Dayîke Sakîne têkoşînê xo xurtêr kerd. Dejê qijanê xo eşt zerrîya xo û sey dayîkêke rayîrê xo rê dewam kerd. Xoverdayîşê xo yê 41 serran de tim haştîye waşte, seba ke zerrîya dayîkan mevêşo  têkoşîn kerd, waşt vengê xo bido eşnawitene. Bi rike rayîrê xo rê dewam kerd û çalakîya Dayîkanê Şemeyî de cayê xo girewt.

Rixmo ke qijê Dayîke Sakîne şerê azadîye de şehîd bîyî aye tim semedê vindarnayîşê şeran têkoşîn kerd.  Çirey têkoşînê haşîye, têkoşînê heqanê merdiman, demokrasî û azadîye ra peyser game nêeşte. Coka Dayîke Sakîne şehîda verên a prosesê haştîye û komelê demokratîk a ke bi vengdayîşê Rayberîya ma ame destpêkerdene. Ma soz danê ke ma do çarçewaya layiqbîyayîşê Dayîke Sakîne û heme dayîkanê xo yê xoverdayoxan de cuyeya haştîye, demokrasî û azadîye înşa bikerê.

Ma veng danê heme komelê xo, cinîyan û ciwanan ke wa wayîrê vîrameyîşê çinarêra ma ya girde, Dayîke Sakîne ya ke şehîda haştîye û komelê demokratîkî ya, bivejê û  têkoşînê ci yê azadîye xurtêr bikerê.''