Koma muzîkî  ya kirdkî (zazakî)  Va û Hîrî hetê 3 cinîyan ê kirdan ra Ewropa de ameye ronayene. Endamê kome Yeşîme Încedursun, Tulaye Ozçelîk û Zerya Karabulut hem karê xo yê bînî kenê hem zî hîrêheme zî dadî yê. Kome armanc kena ke têkoşînê cinîyan ê kurdan pê kilaman komelanê Ewropa rê vajê. Endamê kome 8 serrî verê cû grûbêka erbane de yewbînî şinasnayî û heman wextî de endamê koma cinîyan Dengê Xwezayê (Vengê Xoza) yê zî.

Kome reya verêne 8ê Adare Roja Cinîyan ê Kedkaran a Mîyanneteweyîye de şaristanê Dusseldorfî yê Almanya de vejîyaye sehne ser. Endama kome Zerya Karabulute 31 serre ya û aslê xo de Dêrsimij a. Zerya şaristanê Kolnî yê Almanya de bena pîl û lîseyêk de mamostatîye kena. Endama bîne ya kome Tulaye Ozçelîk zî dewa Kurmêşî ya qezaya Pêrtagî ya Dêrsimî ra ya. Keyeyê Tulaye serra 1989î de koçê Almanya kerd. Tulaye wayîrê domanêkî ya û bi serran Almanya de îdarekarîya futbolî kerda. Tulaye nika şaristanê Kolnî de ciwîyena û sey wezîfedarêka asayîşê taybetî xebitîyena. Endama hîrêyîne ya kome Yeşîme Încedursun zî qezaya Dara Hêni ya Çewlîgî ra ya. Keyeyê Yeşîme domanîya ci de koçê Norveçî kerd. Yeşîme nika şaristanê Bonnî yê Almanya de ciwîyena û şîrketêka taybete de îdarekarîye kena.

Kome zafêr bi kirdkî deyîran vana. Kome armancê xo yê seba muzîkî wina îfade kena: ''Armancê ma yo sereke no yo ke ma wazenê muzîkê xo pêşkêşê komelê Ewropa bikerê. Ma eşkenê qala têkoşînê cinîyanê kurdan pê kilamanê xo bikerê. Coka goreyê ma zaf girîng o ke ma festîvalanê kulturî de ca bigêrê. Ma têna aktîvîteyanê kurdan de ney aktîvîteyanê şaranê Ewropa de zî ca gênê. Her cinîye wayîra hunerêkî ya. La sîstemê serdestîya camêrdan nêverdano ke cinîyî vernî de ca bigêrê. Tarîx de tim cinîyê serkewteyî estbî la berhemê înan tim pê nameyê camêrdan ameyî weşanayene. Ma vera ney de yê. Komel yan zî sîstemêk de ke cinîyî tede azad nîyê, ne demokrasî ne zî edalet yenê caardene.''

Koma Va û Hîrî derheqê muxalîfîya hunermendan de nê çîyî vatî: ''Destpêkê tarîxî ra nata hunermendê rastikênî qet nêbîyî parçeyêkê sîstemî. Huner wexto ke sîstemî ra azade bêro kerdene tim binê tedayan de maneno. Xoverdayîşê vera nê teda dewamkerdişê hunerî yo. Ganî ma hetê huner û sporî ra paştî bidê domananê xo, bi taybetî domananê kênayan.

Hunermendê ke teberê welatî de yê beno ke xo sey azad vînenê. La komelê Ewropa de zî şima nêeşkenê tay kilamanê polîtîkan vajê yan zî rexneyê xo bikerê. Nê hetî ra ma nêeşkenê qala azadîye bikerê.''