Ajansê Fotografan ê Metro yo ke zaf cayanê Başûrî de kar keno 2ê Teşrîna Peyêne ya Roja Rojawanî ya Dinya de Silêmanî de nawitişgehêkê fotografan amade kerd. Cayê nawitişgehî Emne Sureke yo ke wextê Saddamî de zîndanêkê îşkenceyî bi. Serewedaritişê serra 1992î ra dima bi muze. Nawitişgehî de fotografê fotografkêşê kanadayîjî Jey Lawrenceyî yenê mojnayene. Lawrenceyî zaf cayanê Rojawanî û Vakur û Rojhelatê Sûrîye de fotografê şerwananê YPG-YPJyî, QSDyî, Şengalî de dramê roniştoxanê ke zulmê DAÎŞî ra remayêne, fotografê şerwananê YBŞ û YJŞyî û gerîlayanê HPGyî antî.

Lawrenceyî derheqê cayê nawitîşgehî û fotografan de vat: "Ma nika Zîndanê Emne Sureke de yê. No zîndan bi îşkenceyanê vera Kurdan û Iraqijan yeno naskerdene. Kurdanê Başûrî şorişêko serkewte kerd û dîktatorêko sey Saddamî çin kerd. Şerwanê ke nika nê fotografan de yê vera dîktatorêkê bînî vera Erdoganî şer kenî. Ma pê sereberz ê ke fotografê nê şerwanan bale ancenê rewşa Rojawanî ser.

"Bi pereyê nawitişgehî ma do hetkarîya Heyva Sore bikê. Heyva Sore dezgehêkê hetkarî yo."

Îdarekarê metrografîyî Ahmed Necîmî pare kerd ke nawitişgeh heta 11ê teşrîna peyêne do dewam biko û vat: "Kesê ke yenê nawitişgehî hîsanê xo anê ziwan û vînenê ke êyê ke vera DAÎŞî Rojawanî de şer kenê kam ê û bi rêzdarîye xo nêzdîyê înan hîs kenê."

Ciwananê ke nawitişgeh zîyaret kerd ra Pesend Huseyînî vat: "Nawitişgehî tewr zêde Silêmanîy de eleqa dî. Lawrenceyî bi fotografanê YPG-YPJyî hîsê xo mojnayî. Oyo ke tewr zaf bala mi ante fotografê Êzîdîyan bi. Rîyê hêrişanê DAÎŞî ra tewr zêde Êzîdîyan zerar dî."