Vengê koyan ê azadan Awazê Çîya pê albumê neweyî yê bi nameyê ''Botan'' ke berhemanê Botanî ra amade kerd, hewteyê vîyarteyî de platfprmanê dîjîtalan de resa goşdarîkerdoxan. Album de pê formanê Payîzok, Heyranok, Narînok, Delalî, Belûte û Dengbêjîye deyîrê Seydik, Mendê, Mîranê, Rezgê Rezvan, Çiyayê Cûdî, Heyran Jaro, Narîna Minê, Hey Gulê, Êvarê, Xemik Talanê estê.

Amadekarîya albumî serra 2017î ra nata dewam kerdêne. Album Hunergehê Ş. Zerdeştî de pê aranjorîya Mehmûr Berazî ameye kerdene. Endamanê Awazê Çiya Têkoşîn Cûdî, Argeş Delîla, Viyan Kiçî û Hedar Rûbar derheqê albumî de qisey kerd.

Têkoşîn Cûdîyî vat: ''Wexto ke ma dest pê albumî kerd Vakurê Kurdîstanî de têkoşînêko pîl ameyêne kerdene.  Şexsê Mehmet Tunçî, Pakîze Nayir û Asya Yuksel de ma no album dîyarîya şehîdanê xoverdayîşê xoîdarekerdişî yê Botanî kerde. Ma armanc kerd ke ne albumî de parçeyanê Kurdîstanî yê bînan vajê. Ma komêk a ke hem mîyanê şerî de yê hem zî mîyanê hunerî de yê. Ma Botanî ra dest pê kerd û ma do deyîranê herêman ê bînan zî vajê. Ma waşt ke abigêrê cewherê xo. Ma armanc kerd ke ma bibê vengê xoverdayîşê Botanî, vengê gerîlayan û dengbêjîye pêşkêşê komelî bikerê. Ma Cewherê xo ra fek vera nêda û ma do nê cewherî bipawê.''

Endama Awaze Çiya Argeş Delîla zî vat: ''No proje seba pêro Kurdîstanî yo. Ma Botanî ra dest pêkerd. Ma xo rê kulturê kurdan esas gênê. Ma wazenê ke bi rayîrê nê albumî wextê vizêrênî bîyarê ewro û ameyoxî. Ma xîret kenê ke mîrasê dengbêjîye bivurnê zemînêkê kultur û hunerî yê kurdan. Eke ma bieşkê naye bikerê hînî muzîkê kurdkî gamêka xurtêre bierzo.

Endama bîne ya Koma Çiya Vîyan Kiçî vat: ''Ma waşt no vengê koyan ê azadan berz bibo. Ma pê vengê cinîyanê dengbêjanê sey Meryemxane, Nesrîne Şîrwan bîyî pîl. Ganî ciwanî wayîrê nê mîrasî bivejîyê. No tarîxê ma yo. ''

Awazê Çiya ra Hedare Rûbar vat: ''O rast cinîyî zêder wayîrê dîrok, kultur û mîrasî vejîyenê. Babeta wayîrvejîyayîşê kultur û mîrasî de cinîyê Botanî wayîrê cayêkê cîyayî yê. Ma heta peynî perwerê tarîx, komel û erjanê xo yê. Ma zî sey gerîlayan xîret kenê ke temsîlîyetê komelê xo bikerê.''