Çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de Îtalya de bi şîarê 'Wextê Hêvîye' çalakîyî yenê kerdene. Şaristanê Brescia yê Îtalya de zî festîvala tradîsyonele de azadîya Rayberê Şarê Kurdî Abdullah Ocalanî ameye waştene. Bi hezaran kesan yew fekî ra mesajê ''Abdullah Ocalanî rê Azadîye'' da.

Festîvale de Buroyê Enformasyonî yê Kurdîstanî yê Îtalya, Radio Onda d'Urto û Rete Kurdistan Italia panel û konserêk serûber kerd. Bi hezaran beşdaran fotografê Rayberê Şarê Kurdî û alê YPG-YPJyî akerdî. Festîvale de pankartê 'Kurdîstanî bipawê' û 'Ocalanî rê Azadîye' ameyî akerdene.

Panelê bi babeta 'Paradîgmaya Konfederalîzmê Demokratîkî ya Ocalanî û Şorişê Cinîyan' de Temsîlkarê Buroyê Enformasyonî Yilmaz Orkanî û aktîvîste-rojnamegere Zîlane Dîyar qisey kerd.

Zîlane Dîyar pare kerd ke têkoşînê cinîyan îlhamê cinîyan ê bînan bîyo. Zîlane bale ante hêrişanê dewleta tirke yê vera çar parçeyanê Kurdîstanî ser û vat: ''Cinîyan sîstemê xo yo konfederal, rêxistin û dezgehê xo awan kerdî. Garantîya nê sîstemî zî sîstemê hemserekîye yo. Mumkîn nîyo ke hêrişî bi îradeyê cinîyan bieşkê.''

Orkanî ard ziwan ke şarê kurdî paradîgmaya Ocalanî ser o Rojawanê Kurdîstanî de sîstemê îdareyî nayo ro.Orkanî vist vîrî ke paradîgmaya Ocalanî her ke şino vilayê pêro dinya bena. Orkanî vist vîrî ke Abdullah Ocalan binê tecrîdêkê giranî de yo û vat: ''Seba ke tecrîdî bişiknê û Ocalanî azad bikerê hîna zaf paştdayîş ma rê lazim o.''

Panelî ra dima hunermendî Kaos One, DJ Craim, Claver Gold û La G vejîyayî sehne ser.

Wextê konserî de ciwananê îtalyanan kitabanê Rayberê Şarê Kurdî ra çend beşî wendî