Mexmûrijan pê coşê 4ê Nîsane selam da tîje

Festîvala 4ê Nîsane ya ke di rojî verî Mexmûr de dîyabî destpêkerdene ewro sey fînalî dewam kena.

Festîvala 4ê Nîsane ya 13. ya ke di rojî verî Kampa Multecîyan a Şehîd Rûstem Cûdîyî ya Mexmûrî de dîyabî destpêkerdene ewro sey fînalî dewam kena. Festîvala ke rayberîya Komîteya Perwerdeyî ya Mexmûrî de yena serûberkerdene tede mamosta û wendekarê kampe ca gênê.

Wendekar, mamosta û roniştoxê kampe seba fîrazkerdişê 4ê Nîsane rojbîyayîşê Rayberê Şarê Kurdî Abdullah Ocalanî pê kincanê xo yê herêmîyan Merkezê Kultur û Hunerî yê Mexmûrî (NÇHM) de ameyî yewca. Deqayêkê rêzgirewtişî ra dima Festîvala 4ê Nîsane dest pêkerde. Meydanê şayîye pê fotografanê Rayberê Şarê Kurdî Abdullah Ocalanî û şehîdan xemilîya.

Festîvale de wendekaran hunerê xo serê sehne de mojnayî, şîîrî wendî. Endamanê NÇHMyî zî skeç û berhemê xo pêşkêş kerdî.

Nameyê mamostayan ser o Hemsereka Komîteya Perwerdeyî ya Mexmûrî Bêrîvane Kaya qisey kerd. Kayayî rojbîyayîşê Rayberê Şarê Kurdî fîraz kerd û venga pêro kurdan da ke wayîrê Abdullah Ocalanî vejîyê.

Pawîyeno ke Festîvale heta şewe dewam bikera.