Pê muzîkê kulturkîyî Destanê PKKyî

Koma Awaza Çîya pê fîlmê muzîkalî yê bi nameyê 'Destana PKKyî' qala tarîxê PKKyî û heqîqetê gerîlayan kerd.

Koma Awaza Çiya serra2020’î dest bi viraştişê  fîlmê bi nameyê Destana PKKyî kerd. Vate û muzîk ê Awaza Çiya yê. Koro 46 kesan ra yeno pê. Destanê PKKyî pê bass, solo, tenor û soprano ame vatene. Deyîrê ke pê tembur, gitar, bass gitar, çello, piyano, keman û xeylêk aletanê bînan ê muzîkî amey vatene bi ahegî ameyî ziwan.

Endamê Awaza Çiya Tekoşîn Cûdî û Seyît Riza Silbusî yê ke îdareyê projeyî de ca genê derheqê Destanê PKKyî û projeyanê xo yê bînan de ANFyî rê qisey kerd.

Tekoşîn Cûdî: Ma cehd kerd ke pê destanêkê tarîxkîyî yew dewrê PKKyî teqdîmê şarî bikerê. Ma pê projeyê xo vat Destanê PKKyî do tim dewam bikero. PKK zaf rengin o. Ma zî Destanê PKKyî wina girwet dest. Destan de hem sînema, hem tîyatro, hem şîîre, hem dans û hem zî folklor û klîp est ê. Heme başê hunerî yenê şuxulnayene. Ma 2020 de dest pê xebate kerd. Hedefê ma o bi ke ma biresne serrgêra ronayîşê PKKyî yê 2022yî. Verî zî xebata ci amebî kerdene.  46 ra zafêr kesan koro de ca girewt. Tecrubeyêko newe bi û xebetêka hîra bî. Çîyêko verên bi û zaf rengin bi. Ma cayê şerî û bêîmkanîye de wina yew xebate kerde û îdîaya xo vet werte.  Eslê xo de cayo ke tede astenkerdişî est ê de xebatê dahîna serkewteyî vejîyenê werte. Kesê ke pê hunerî eleqedar benê bitaybetî hunermendê şorişgêrî têna yew babete rê eleqedar nêbenê, xo sînordar nêkenê û gamanê afernayoxan erzene. Ma sey Awaza Çiya têna proje nê planê ma yê rojane est ê. Pê Destanê PKKyî bi desan program, klîp û hîrê albumî ma kerdî. Xebata esasî Destanê PKKyî bî la ma bi hewayêkê hemwextî her roje projeyanê cîyayan rê zî eleqedar bîyî.  Hedef û projeyê ma halê orjînalî yê kultur û hunerî yê şarî bîgêrê dest, ganî bikerê û biafernê.”

Seyîd Riza Silbus: ‘‘Muzîk û hîkaye kulturê kurdan de wayîrê cayê muhîmî yê. Muzîk û hîkaye kulturê Kurdîstanî û kurdan tarîxî ra heta roja ma ardî. Qewimîyayîşê Kurdîstanî tim pê hîkaye û muzîkî resayê roja ma. Ma zî waşt wina qala Destanê PKKyî bikerê. Ma qala rayraşîyayîşê azadîye yê 50 serran kenê. Xora çew se keno wa bikero nêeşkeno nê bi tamamî bîyaro ziwan. Ma nêeşkenê vajê pê projeyî qala heme PKKyî ameye kerdene. Çend ma destê ra ame ma kerd. Destanê PKKyî warê şerî de ame kerdene. Ma goreyê raştîya şerî xo rêxistine kerde û warê winayênî de îmza eşt nê destanî.Hesabê ma de rîyê şerî ra nîmcet mendişê projeyî zî bibi la ma kerd xo çeng, bi hewayêkê qerardarî dest pê projeyî kerd. Ma waşt pê nê projeyî pê muzukî qala tarîxê PKKyî û heqîqetê gerîlayan bikerê û pê hunerî bimanê.”