Her şar pê namdaranê xo şinasîyeno û tarîxê şaran serkêşîya nê namdaran de nusîyeno. Tarîxê kurdan de hozan û dengbêjan tim pê kilamanê xo dej, hesret, eşq û têkoşînê kurdan ardî ziwan.

Rencber Ezîz zî nê hozanan ra yew o.

Rencber Ezîz (Mehmet Hanefî Berdîbek) serra 1955î de dewa Wisifan a Çewlîgî de dadîya xo ra beno. Rencber hema ke doman bi janêkî ra beno kor. Nê serebûtî ra dima ê keyeyê xo benê merkezê Çewlîgî.

Keyeyê Rencber Ezîzî 1968 de ey şaweno kursê Quranî ke wa bibo hafiz. Rencber Ezîz hetêkî ra şino kursê Quranî, hetêkî ra zî pê temburê xo embazanê xo rê deyîran vano. Erdlerzê 1971î de dadîya Recber Ezîzî dinyaya xo bedilnena û no merg zaf tesîrê Ezîzî keno.

Rencber Ezîz 1972 de şino Îstanbul û Mekteba Mewlîdxaneyî de waneno. O Îstanbul de Cemîyetê Koran de wendiş-nuştişî museno û muzîkî dir eleqedar beno. Ezîz o çax zî dano temburî ro û wextêkê kilmî ra dima zî vejîyeno sehne ser.

Bi deyîranê xo eşqê xo yê Kurdîstanî eşkera kerdêne

Serrê 1975-1980î seba kurdanê Vakurê Kurdîstanî serrê tewr zehmetînî bîyî. Hetêkî ra partî û rêxistinê kurdan ronîyayêne, hetêkê bînî ra zî hêriş û înkarê dewleta tirke dewam kerdêne. Ezîz nê atmosferê polîtîkî de tewrê konseran beno û her ca de bala merdiman anceno.  Atmosferê Darbeya 1968î o çax zî bitesîr bi.  Ê serran de hozananê sey Mahsûnî tesîrê ciwananê çepgîran kerdêne. Ezîz zî binê tesîrê Hozan Mahsûnî û Hozan Îhsanî de maneno û konseranê xo de deyîranê nê hunermendan vano.

Nê hozanan ra cîya Rencber Ezîz meseleyanê komelkîyan û neteweyîyan ê kurdan de eleqedar beno û bi ziwanê xo yê dayîke kirdkî hozanîye keno. Rencber Ezîz deyîranê xo de qala dej, derd û eşqê Kurdîstanî keno.

Hozanê şarê xo

Rencber Ezîz Îstanbulî ra agêreno Çewlîg û tewrê komeleyanê şorişgêran beno. Têgêrayîşê Azadîye serranê 1974-1975î de newe ra beno aktîf. Çewlîg de hem komeleyê şoişgêrî hem zî rêxistinê faşîstî rêxistinkerde bîyî. Rencber Ezîz zî tewrê kombîyayîşan beno.

Rencber Ezîz deyîranê xo de bale anceno îşxalê Kurdîstanî û 'têduştîye', 'way û biratîye', 'neteweya kurdan' ser o deyîran vano. Rencber Ezîz heskerdiş, hesret û hîsanê xo yê serê Kurdîstanî pê na deyîre ano ziwan:

Welatê me Kurdistan e

Cih û meskenê me Kurdan e

Welat ji me re ruh û can e

Kurd hemû bira ne

Cih û meskenê me Kurdan e

Temam bax û bostan e

Welat gul e gulistan e

Kurd hemû bira ne.

Eşqê ci yê Kurdîstanî benê çimê ey. Tarîtîye nêeşkena ke o welatê xo ra hes bikero. Dejê ey o tewr pîl no bi ke erdê Kurdîstanî de kolonyalîzm serdest bi.

Koçê Almanya keno

Darbeya 1980î ra verî Kurdîstan de şîdetê dewlete zêdîyayêne. No sey pêro kurdan tesîrê Ezîzî keno û 1978 de o neçare maneno ke koçê Almanya bikero. Nê serran de merdimê ke surgun de bîyî pê kasedanê teybî agahîyan şawenê yewbînan û hesreta xo anê ziwan.

Serrê Almanya

Ezîz Almanya de zî deyîranê neweyan virazeno û tim rewşe ser o fikirîyeno. O vera cuntaya 12ê Êlule û Qirkerdişê Helebçe pê deyîran xo ver dano. Vera Qirkerdişê Helebçe deyîra 'Way way nînna' nuseno.

Rencber Ezîz pê kasetê Hesreya Azadî hesreta pêro kurdan ano ziwan û beno vengê şarê xo.

Hozan û şorişgêro kurd Rencber Ezîz 1988 de şaristanê Hannoverî yê Almanya de dinyaya xo bedilneno û xo ra pey xeylêk eserenê bêmergan verdeno.

Rencber Ezîzî pê vengê xo nefes û vengêk da şarê xo. O bi xo bi çimê şarê xo, wijdanê şarê xo.

Rixmo ke mergê ey 34 serrî xo pey de verdayî Rencber Ezîz hema zî zerrîya kurdan de ciwîyeno.