Şaredarîya Sûrî û Merkezê Kulturî yê Îva seba ke kuçeyan rind bikê, xebatanê grafîtî kenê. Çarçeweya projeyî de kuçeyanê Sûrî ra fîgurê dengbêje Fatma Îsa û Şahmerane yenê xêzkerdene.

Resamanê cinîyanê ke heta nika dêsanê kuçeyê Keyeyê Dengbêjan, Merkezê Kulturî yê Laleşî û kuçeyê Duçemî ser o fîgurî xêz kerdî, îfade kerd ke armancê înan  hem kuçeyan rind kerdiş o hem zî seba têdûştîya cînsîyî hayekerdiş o û vat: "Ma dêsanê Sûrî ser o fîgurê cinîyan xêz kerdî. Xebatanê ma ra yew zî Şahmarane bîye. Meseleyê Şahmaranî tîya de zaf hol yeno zanayene. Ma dêsê bînî ser o zî fîgurê dengbêje Fatma Îsa xêz kerd. Ma zanenê ke seba Kurdan dengbêjîye çend girîng a. Bi na xebate ma hem girîngîya dengbêjanê cinîyan hem zî girîngîya kulturê ma arde verê çiman."

Hemsereka Şaredarîya Sûrî Fîlîz Buluttekîne zî da zanayene ke armancê înan rindkerdişê Sûrî yo û vat: "Fîgurê cinîyî bi pawitişê tarîxê Sûrî, goreyê kulturê ci ameyî xêzkerdene. Nika xebatî têna tayê kuçeyan de dewam kenê labelê dima nê xebatî do dewam bikerê. Cinîyan kuçeyê ma kerdî rind û ê do nê xebatanê xo rê dewam bikerê."