Rêzefîlmê bi nameyê Evîna Kurd a ke 15 beşan ra yena pê Rojawan de ame girewtene. Rêzefîlm 2ê nîsane de do bêro weşanayene û tede qala cuya Rojawanî yena kerdene. Senarîstanê rêzefîlmî Endama Tîyatroyê Çîyayî Ekîne Ronî, Hemserekê TEV-ÇANDî yê Mezopotamya Adnan Îbrahîm derheqê xebatanê xo de cewab da persanê ANFyî.

Warê Şorişê Rojawanî Kurdîstan de fîlm, rêzefîlm ûsn de afernayîşê berhemanê hunerî de kedêka pîle daye. Ganî ma ney senî biercnê?

Adnan Îbrahîm: Şorişê Rojawanî warêko azad o. Kurdîstan de tewr zaf Rojawan de xebatê hunerî yenê kerdene. Ganî hunermendê kurdî verê xo bidê Rojawanî û şarî rê serkêşîye bikerê. Bêrê ma dormeyê şorişê rûmetî de kom bibê. Xebatkaranê Komunê Fîlman ê Rojawanî pê tecrubeyanê xo Evîna Kurd a bi 15 beşan girewte.

Ekîne Ronî: Ewro pêro dinya de rêzefîlmî tesîrê merdiman kenê. Mîsal rêzefîlmê Tirkîya Kurdîstan û Rojhelatê Mîyanênî de raştê eleqeyêkê pîlî yenê û nê televîzyonanê ereb û kurdan zî îşxal kenê. Huner ziwanêkê raştîye yo. No çi bingeyê ferasetê ma yo zî. Ma bi kurdî sînemaya xo, hunerê xo kenê. Yanî bi ziwanêko ke hedefê çinkerdişî de yo. Ma bi Şorişê Rojawanî îmkanêko pîl vist dest. Ma bi serran tîyatroyê tirkî viraşt. Mi verî kurdkî zî nêzanayêne. La nika berhemanê xo bi kurdkî nusena. Her çî ra ver seba ke ez eşkena seba şarê xo karêkê bi kurdkî kena zaf kêfweş a. No seba mi averşîyayîşêko girîng o.

Senaryoyê Evîna Kurd senî nusîyayo? Kame/e tede cagirewte û destek da ci?

Ekîne Ronî: Wexto ke ma senaryo nuştêne waşt ke xo biresnê ê kesanê ke Rojawanî û têgêrayîşê azadîye ra dûr ê. Ma waşt ke hem şorişî hem zî hunerê xo bidê şinasnayene. Ma bi panc embazan dest pê xebate kerd. Embazanê ma Mizgîne, Ciwan û Hogirî zî kedêka pîle daye senaryo.Ma pîya na hîkaye afernaye. Reyna embaz Onder Çakar, Haşim Aydemîr, Hebûn û Andokî zî kedê girîngî dayî. Verî ma 5 beşî nuştî la dima 15 beşî vejîyayî werte.

Adnan Îbrahîm: Ma qasê 2 mengan senaryoyî ser de xebitîyayî. Verî ma nîqaşê xo kerdî. Hêrişanê vera Efrînî de ma beşo diyîn nuştêne. Kome de 5 embazî bîyî. Dima embazî şîyî waranê bînan. 2022 de ma ra 2 tenî mend bîyî. Rixmê zehmetîyan zî ma 15 beşî bi serkewtişî qedînayî.

Babeta rêzefîlmî çita ya?

Ekîn Ronî: Hîkayeya ma hîkayeya keyeyêkê pîlî ya. Yanî hîkaye seke fotografêkê Rojawanî yo pîl o. Keye ra tay tenî wazenê şorê, tay tenî wazenê bimanê têkoşîn bikerê. Babeta ma tarîxê nêzdîyî yê Sûrîye, rejîm, DAÎŞ, hêrişanê dewleta tirke rê ewnîyena.

Adnan Îbrahîm: Rêzefîlm de 3 birayî û 3 keyeyê ke temsîlkarîya komelê Rojawanî kenê est ê. Birayo pîl Mihemed citkar o. Oyo bîn Azîz tim gêreno xezîne û berhemanê tarîxîyan. Birayo qij Îbrahîm Şam de maneno û yew filîstînije de zewijîyayo. Destpêkê şorişî de Îbrahîm wazeno abigêro Rojawanî û tewrê şorişî bibo. Azîz wazeno Rojawanî biterikno û şoro Ewropa. Ma rêzefîlm de qala vurîyayîşê nê 3 birayan kerde. Rêzefîlm de her di hetê eşqî asenê; eşqo raştikên û eşqo sexte.

Prosesê girewtişê fîlmî senî bîyo?

Adnan Îbrahîm: Komunê Fîlman Kobanê, Efrîn û Cizîre de endamê xo kom kerdî. Rixmê hêrişanê dewleta tirke zî 8 mengan de ma rêzefîlm girewt û safhaya montajî qedînaye.

Ekîne Ronî: Komunê Fîlman ê Rojawanî nê serranê peyênan de xeylêk xebatî kerdî, fîlmê girîngî viraştî. Înan nê rêzefîlmî de zî zaf kede daye. Na xebate seba şarê kurdî destpêk a. Ma hêvî kenê ke bi temaşekerdişê nê berhemê ma şarê ma do kêfweş bibo.

Şima eşkenê nê lînkî ra fragmanê rêzefîlmî seyr bikerê: