Romanê Newzad Valêrîyî yo verên 'Demserrê Vîrî' Weşanxaneyê Avesta ra vejîya.

Roman bi temamî 208 rîpel o.

Newzad Valêrîyo ke bi nasnameyê xo yê akademîsyenî zî şinasîyeno kitabê ci yê şîîran, açarnayîşî û estanikî zî est ê.

Romanê 'Demserrê Vîrî' ra beşêk wina yo:

''Ez verê cû zî fikirîyabîya, rast yan xelet, hewl yan xirab ganî ez dara xo ra bikewtêne û biameyêne tîya. Serebûtêko bêtaleh amebî sereyê mi, ê tena bîbîy wesîleyê na raywanîya min a derge. Bi rastî zî mi dî ke, nişka vernîya mi de no rayîro newe bî derg û ez zî ca bi ca gêraya û peyê aqubetê xo ra ameya. Sey dengbêjanê welatê xo yê ke ê gan danê vengan, sey xalê xo Dengbêj Filîtî, ez zî kewta rayîran, dûrî ra dûrî şîya. Çend serrî yo ke ez ge bajaran, ge herêman, ge welatan ra gêrana. Koçkerdiş, surgunbîyayîş û warê xo ra remayîş sey tayê merdiman bîbîy barê mi zî.

Remayîş birînêk o.

Çend wisarî çerexîyabîy nê çerxê zemanî de. Wisarî ameybîy û şîbîy. Pitikî bîbîy tutî, tutî bîbîy ciwanî, ciwanî bîbîy pîrî û pîrî zî dinyaya xo bedilnaybî û şîbîy dûrî. Her yewî, wina yew dewrê xo de têgêrabî. Labelê hema Dapîre sanikan ra; Dengbêj Filît kilaman ra û Murad zî versîya înan ra dûrî nêkewtbî o wisar.''