Amed de aktîvîteyê pîrozkerdişanê 15ê Gulane Roşanê Ziwanê Dayîke dîyenê destpêkerdene.

Deklarasyon hetê Komeleya Cigêrayîşanê  Kultur û Ziwanî ya Mezopotamya (MED-DER), Enstituyê Kurdan ê Amedî, Komeleya Edebîyatkaran ê Kurdan, Kovara DESTARî, DBP, DEM Partî, TJA, komeleyê Anka, Ari, Arsisa, Birca Bilek, Botan, Ziwan û Kultur yê Feratî ra Komeleya Kultur û Hunerî ya Dicle de ame eşkerakerdene.

Metnê kurdkî yê deklarasyonî lehçeye kirmanckî de hetê Hemvervatoxa Komîsyonê Ziwan, Kultur û Hunerî yê DEM Partî Cemile Turhalli Balsak ra ame wendene. Kurmanckî zî hetê Firat Ronî ra ame wendene ke warê ziwanî de xebatan rayra beno. 

Turhali vist vîrî ke 2006î ra nata 15ê Gulane sey Roşanê Ziwanê Kurdkî yeno pîrozkerdene û nê vatî: “Her hetê dinya di kurdî nê roşanî bi coşî pîroz kenê ke ziwanê kurdkî bipawê. 15ê Gulana 1932yî de  roşnvîrê kurdan Celadet Elî Bedirxan û embazanê ci Şam de kovara Hawarî vete. No semedê kurdan gamêka tarîxî bî. "

Turhale vatişê  "Ziwan beden o, kultur beden o, miqatê bedenê xo bi " yê Rayberê Şarê Kurdî Abdullah Ocalanî vist vîrî û vat: "Hêrişê vera ziwanê kurdkî û tecrîdê serê Birêz Abdullah Ocalanî yewbînî ra cîya nîyê, nê polîtîkayê înkarî yê vera kultur, ziwan û nasanmeyê kurdan ê. Kurdî vera nê hêrişan têkoşînê pawitiş û averberdişê erjanê xo neteweyîyan danê.  Ziwan nasname û statuyê şaran mojneno ra. Coka ganî ziwanê kurdkî bibo ziwanê perwerdeyî. Perwerdeyê ziwanê dayîke heqo esasî yo. Nê welatî de bi mîlyonan domanê kurdan nê heqî ra mehrum ê. Şarê kurdî do tim semedê azadîye,  nasname û kulturê xo têkoşînî rê dewam bikero. Şarê kurdî do vera zextan  estbîyayîş û nasnameyê xo bipawo, têkoşînê xo yê azadîye xurt bikero û bi ziwanê xo sîyaset bikero. Ma do her warê cuye de ziwanê xo bişuxulnê û yewîya neteweyî bîyarê ca.

Ma do mabênê 11ê gulane ra heta 1ê hezîrane Kurdîstan û Tirkîya de Rayraşîyayîş, konser, festîval, vilakerdişê vilawekan, panel û foruman organîze bikerê. Sere de cinî û ciwanî ma veng danê dezgehan, partîyanê sîyasîyan û şarê kurdî, ma têkoşînê ziwanê kurdkî xurt bikerê. Her wext û her ca de kurdkî bifikîrê, kurdkî qisey bikerê, kurdkî biwanê, kurdkî binusê û kurdkî biciwîyê."