Fuarê Kitaban ê Mezopotamya yê Amedî yo ke hetê Odaya Sanayî û Bazirganîye ya Amedî (DTSO) ra yeno kerdene, heta 24ê kanûne  Merkezê Kongre û Fuaran ê Mezopotamya de dewam keno. Xeylêk weşanxaneyê kurdkî fuar de verê standanê xo de pabeyê wendoxan ê.

Weşangerê ke tewrê Fuarê Kitaban ê Amedî bîyê înan ANFyî rê qisey kerd.

Azad Zal (Weşanxaneyê J&J): Ma rê girîng o ke 4 serran ra dima Amed de fuarê kitaban ancî yeno kerdene. Roja verêne ra nata şar eleqeyêkê pîlî mojneno fuarî. Seba ke cewab bidê şarê kurdî ma do hîna zaf kitabanê rindan çap bikerê û vila bikerê. Xêrê fuaranê winayênan ra şarê ma eşkeno xo bi rehetî biresno kitabanê bi kurdkî.

Halîl Samed (Weşanê Red): Mabênêkê dergî ra dima ancî ma xo resna wendoxan. Fuar bi hawayêkê qerebalixî dewam keno. Ma hêvî kenê ke no eleqe tim do est bo. Ma bi 110 kitaban û 35 nuştoxanê xo tîya de yê.

Bawer Berşev (Weşanê Dara): Nêzdîyê di mengan o ma amadekarîya nê fuarî kenê. Fuarî ra ver ma 24 kitabî çap kerdî. Qerebalix zaf o. Ma emser bi 4 nuştoxanê xo tewrê fuarî bîyî. Çend nuştoxê ma zî teberê welat û şaristanî de yê coka ê nêeşkayî bêrê.

Berfo Barî (Weşanê Na): Ma bi hesreta Fuarê Amedî bîyê. Sey roniştoxêkê Amedî ez kêfweş a ke tîya de ya. Weşanxaneyê kurdan ê ke bi kurdkî weşane kenê, bazar de meseleyan ancenê. Seba ke no bazar xurt bibo, fuarê winayênî ganî zêde bibê. Sey weşanxaneyî ma bi 30 nuştoxan tewrê fuarî bîyî.