Weşanxaneyê kurdanê ke fuarê kitaban ê 38. yê Îstanbulî de eleqeyo ke pawitene nêdîyo, na rewşe hawayê sîyasî yê Tirkîya û krîzê aborî ra da girê. Temsilkarê nê weşanxaneyanê ke derheqê kurdkî de rastê hukmê pêşînî zî yenê waşt ke seba wayîrvejîyayîşê kurdkî wa kitabê kurdkî bêrê wendene.

Fuarê kitaban ê 38. yê Îstanbulî yo ke 2ê teşrîna peyêne de berê xo akerdî, Merkezê Kongre û Fuaranê TUYAPî yo ke Büyükçekmece de yo de kesanê ke hîna fuar zîyaret nêkerdo paweno. Temayo bingeyên ê fuarî “Azo 50.ê Edebeyîyatê ma” yo û nuştoxê rûmetî yê emserî zî Adnan Özyalçıner o. Zerê û teberê welatî ra 800 ra zêdêrî weşanxaneyê ke ziwananê cîyayan de weşan kenê beşdarê Fuarê kitabano ke roje de 40 hezar kesî zîyaret kenê bîyê. Weşanxaneyê kurdan ra Aram, Hîva, Lîs, Rûpel, J&J û Nûbihar zî fuarî de ca girewto.

Derheqê Kurdkî de Hukmê Pêşînî Estê

Temsilkarê weşanxaneyanê kurdan ê ke wendoxanê kurdî pawenê gazînî kerdî ke hawayê sîyasî yê Tirkîya û krîzê aborî ra serkewte eleqeyo ke pawitene nêdîyayo. Zafêrî weşanxaneyê ke standanê xo de kitabanê kurdkî roşenê vera kurdkî hukmanê pêşînan de têrî manenê. Weşanxaneyê Hîva yo ke bi kurdkî kitabanê domanan weşaneno ra Şîvan Zerenî nê hûkmanê peşînan ra yew wina sey nimûne da.

Wendoxî winî zanê ke kitabê kurdkî yan îngîlîzkî yan zî fransizkî yê û wexto ke musenê ke kurdkî yo vanê kurdkî yew ziwano pêserkerde yo. Tewr zî yew profesoro ke ameyo standê înan vato ke “kurdkî yew ziwan nîyo, farskî û tirkî ra ameyo pêser.” Naye ser o Zerenî vato ke “eke wînî yo kerem ke biaçarne tirkî” la peynîya sohbetê derg û dilayî de profesorî qebul kerdo ke o derheqê kurdkî de wayîrê yew hukmê pêşînî yo.

‘Keso ke Kitbanê Kurdkî Gêno Xo Dest Keweno Pîsîkolojîyê Suvî‘

Zerenî vat ke kesê ke ênê fuarî bi rehetî persan pers nêkenê û dewamê qisaya xo de wina vat “Averşîyayîşîşanê sîyasî merdimî kerdê krîz. Merdimî xo ragênê, nêeşkenê ke xo rehet îfade bikerê. Yewo ke kitabê kurdkî gêno xo dest seke yew suc bikero xo winî hîs keno.”

'Krîz û Kaosî de Verênîyê Merdiman Eşkenê Cîya Bê‘

Xebatkarê weşanxaneyê Lîsî Nîhat Gultekînî zî îfade kerd ke polîtîkayanê rojane yê welatî ra serkewte fuar seba înan qels vîyareno. Seba ke merdimî kitaban biwanê ganî yew atmosfero baş bibo. Yew welato ke tede kaos û krîz esto de verênîyê merdiman eşkenê cîya bibê. Ez vînena ke wendoxî bedvîn ê. No hetê negatîfî tesîrê ma zî keno. Peynî de se beno bibo çîyo ke ver dano cuye  kitab ê. Ganî wendoxê kurdan muheqeq bêrê nê fuarî û ma tena camerderê. Ganî ma hêvîya xo vîndî mekerê.

Weşanxaneyê J&Jyî ra Suleyman Fidayî dîyar kerd ke fuar gore seranê bînan emser zaf qels derbaz beno. Û sebebê nê zî krîzê aborîye yo. Reyna avarşîyayîşê sîyasî zî tesîrê na yewe kenê.

‘Ma Seba ke Nîşan Bidê ke Ma Nayê Tîya Beşdar Benê‘

Koordînatorê weşanxaneyê Rupelî Şenel Kumuzî dîyar kerd ke seba ke ziwanê kurdkî sey ziwanê perwerdeyî nîyamo qebulkerdene , polîtîkayê dewreyî eleqedarîya kitabanê kurdkî ser o tesîr kenê. Temsilkarê Weşanxaneyê Nûbiharî Ömer Faruk Fayadî zî dîyar kerd ke hetê wendoxanê kurdkî ra Dîyarbekir Îstanbulî ra hîna bihereket o.

Fuadî vat ke ma tena seba rotişê kitaban ney ma seba ke nîşan bidîme ke ma zî tîya yê yenê fuar. Zaf tay merdimî kitabanê kurdkîyan gênê. Seba ke perwerdeyê kurdkî çin o hûmara wendoxan zî tay a. Vîst serre pewrwerde vînenê yew serra nê perwerdeyî zî kurdkî nîya. No zî yew problemo pîl o. Fayadî vat ke seba ke ma wayîrê kurdkî vejîê ganî kitabanê kurdkîyan biwanê.