Konferanso ke Centre Culturel Espace Maghde yeno kerdene do di rojî derg bikero. Konferanê "Serra ci ya 100. de Serewedaritişê Şêx Sedî, Têgêrayîşê Azadî, Şêx Seîd û embazê ci, vîr û îtîrazo kolektîfî "hetê Kongreya Neteweyî ya Kurdîstanî (KNK), Komelê Îslamî yê Kurdîstanî (CÎK) û Enstîtuya Kurdan a Belçîka ra yeno organîzekerdene.

Konferans bi wendişê marşê Ey Reqibî û rêzgirewtişî dest pêkerd. Dima ra Hemserekê KNKyî Ahmet Karamusî qiseykerdişê akerdişî kerd û vat Lozan de îradayê şarê kurdî ame çînhesibnayene û serewedaritişê Şêx Seîdî vera nê înkarî cewabêk bi.

Serekê CÎKî Mele Şevket Çakir zî ard ziwan ke wextê rijyayîşê Osmanîyan de kurdî pîya bi tirkan têgêrayî la Ataturkî paştdayîşê kurdan înkar kerd û bi polîtîkayanê qirkerdişî cewab da kurdan. Çakirî vatişê “Ez zana şima do mi îdam bikerî la tornê mi do qesasê ma bîgîrê” yê Şêx Seîdî  vist vîrî û vat; “Ewro no têkoşîn hetê Têgêrayîşê Azadîye yê Kurdan ra yeno kerdene. Hinî înkar qedîya. Kurdî ewro bi cigêrayîşê haştîye û heqî masa de yê.”

Serekê Komeleya Şêx Seîdî Mehmet Kasim Firat zî mesajê xo yê bi video de ard ziwan ke serewedaritişê Şêx Seîdî têkoşînê heq û azadîye yê şarê kurdî yo semedê yewbîyayîşê kurdan veng da.

Konferansî bi sînevîzyonê ke derheqê Serewedaritişê Şêx Seîdî ame hazirkerdene dewam kerd.