Têgrayîşê Kultur û Hunerî yê Kurdan ê Ewropa koferansê xo yê hewtine mabênê 8-10ê nîsane de kerd. Konferanso ke bi şîarê Ma vera qirkerdiş û îşxalî têkoşînê kulturkî pîl bikerê ame kerdene çar hetanê Ewropa ra 100 delegeyî  û hunermendê memanî tewrê ci bîyî.

Konferans  şexsê şehîdanê warê kultur û hunerî Hozane Mîzgîn, Sefkan, Serhat, Halil Dag, Delîla, Mazdek Araratî de semedê şehîdanê têgêrayîşê azadîye bi rêzgirewtişî dest pêkerd. Dima ra dîwan ame vîjnayene û rojdem ame bewlîkerdene. Bado ke rojdem ame ercnayene, raporê falîyetî yê waran ameyî wendenê û muneqeşeyan dest pêkerd.

Derheqê konferans de eşkerayîyêke ameye dayene û ame vatene ke konferans bi serekwtişî ame kerdene û xeylêk qerarê muhîmî ameyî girewtene. Konferans de munaqeşeyê muhîmî, rexne û xorexnekerdişî ameyîkerdene û mesajê pîlkerdişê hemleya têkoşînî ya warê kulturî vejîyayî vernî. 

Eşkerayîye de nê ameyî vatene: '' Sîstemo kapîtalîst keno ke merdim û komelî hetê hîsî ra biqedîno. Xebatê kultur û hunerî eşkenê verê naye bigêrê. Coka berpirsîyarîya ma ya tewr pîle aya ke ma moral û ruh budê komelî. Xebatê kultur û hunerî yê ke serkêşîya cinî nêvînenî û azadîya cinî esas nêgenê kêm ê. Coka ganî heme xebatan de rolê cinîyan ser o bêro vintertene. Hela ke çew xorî biewnîyo vîneno ke felsefeya cuya ma binê tesîrê îdeolojîyanê bînan de ya. Coka ma sey kedkeranê kultur û hunerî wezîfe û berpirsîyarîyanê xo nêanê ca. Binê tesîrê teberî de mendiş xo ra remayîş û xo înkarkerdiş o. Ganî ma bibê xo. Hêzê xo ra bawer bikerê û pê hêzê xo gure bikerê. Ganî eserê keda kolektîfî mero letekerdene û sey mulkê taybetî nêro ramojnayene. Warê muzîkî bîyo sey warê sermaye. Muzîko otantîk ê kurdan eslê ci ra yeno dûrîfînayene. Ganî vîra nêşiro ke Kurdîstan de huner bi hîs û fîkrê xoserî eşkeno aver şiro. Ma do têkoşînê warê kultur û hunerî pîlêr bikerê. Bê serkewtişî yewna rayîrê ma çîn o.''